VOV4.Bahnar - Kơ sơ̆ ‘năr 26/4, tơ̆ Hnam Kuôk hô̆i, Kơ dră Kuôk hô̆i Vương Đình Huệ hlôi sơng yă Pany Yathotou, Bơ ngai jang lơ̆m Anih tơm Chĭnh trĭ Đảng Kon pơ lei kach mang Lào, Phŏ kơ dră teh đak Cộng hoà Dân chủ Nhân dân Lào tŏk bŏk tơ mang tơ̆ Việt Nam. Lăng ‘lơ̆ng pơ tôch pơ ma đam đơ̆ng 2 Phŏ Kơ dră teh đak pơ gơ̆r năr âu mơ̆n, Kơ dră Kuôk hô̆i Vương Đình Huệ pơ ma hơ dăh, Kuôk hô̆i Việt Nam gô vă set hơ len păng hơ met pơ ‘lơ̆ng dôm tơ hlăk tơ hlĭn găh trong jang vă pơm tơ drong hiôk ăn anih jang mơ dro sa 2 păh jang hơ dai đei yua hloh dơ̆ng, tơ gop pơ trŭt tŭn jên mơ dro sa Việt Nam-Lào, kŭm nhen hơ nhăk tơ drong pơ vei mŭk drăm, mơ dro sa, tơ mơ̆t jên jang 2 teh đak hơ tŏk tơ iung, tơ gop hơ tŏk ‘lơ̆ng tơ drong arih sa kon pơ lei. Kŭm hăm ‘noh, Kuôk hô̆i Việt Nam tơ gŭm tơ drong hơ tŏk loi dơ̆ng pơ tho pơ hrăm sinh viên Lào kŭm nhen pơ ma dơ nuh tơ drong jang đơ̆ng kang ƀô̆ dôm anih jang hữu quan 2 teh đak.

Thuem: Tơ blơ̆