VOV4.Bahnar -Tơ̆ Hnam Kuôk hô̆i Kơ dră Kuôk hô̆i sơng Thủ tướng Malaysia Dato’ Sri Ismail Sabri bin Yaakob kơ kuh pơ ma dơ nuh ƀlep ƀơ̆t năm tơ mang tơ̆ Việt Nam. Tơ̆ jơ sơng, Kơ dră Kuôk hô̆i Vương Đình Huệ chhôk hơ iă păng lăng ‘lơ̆ng ‘măng năm tơ mang mă blŭng đơ̆ng Thủ tướng Malaysia truh tơ̆ Việt Nam tơ gŭm pơm tơ drong ‘lơ̆ng pơ trŭt păng pơm gĭt kăl hloh tơ drong pơ vei jang hơ dai. Kơ dră Kuôk hô̆i lăng ‘lơ̆ng pơ tôch pơ ma đam hơ dăh ‘lơ̆ng, đei yua đơ̆ng 2 thủ tướng, kŭm nhen tơ drong 2 teh đak hlôi iŏk đei dôm tơ drong drơ̆ng nơ̆r ‘nao, lơ̆m noh đei tơ drong drơ̆ng nơ̆r găh jang hơ dai bơ ngai jang păng jang hơ dai khôi luơ̆t; athei Khŭl kơ dră teh đak 2 teh đak jăh tơ lĕch jang dôm trong jang hơ dai vă vang tơ tĕnh tơ iung ming păng hơ tŏk tơ iung mŭk drăm - tơ pôl; ‘meh vă Khŭl kơ dră teh đak Malaysia hơ nơ̆ng pơm tơ drong hiôk ăn bơ ngai jang Việt Nam tơ̆ Malaysia. Kơ dră Kuôk hô̆i Vương Đình Huệ pơ ma hơ dăh, Kuôk hô̆i Việt Nam lăng kăl păng ling lang hơ drin tơ gop lơ̆m tơ drong hơ tŏk tơ iung pran kơ tang hloh dơ̆ng tơ drong pơ vei jang hơ dai hăm Malaysia; athei Kuôk hô̆i 2 teh đak pơ ma dơ nuh, yak truh kĭ đei 1 tơ drong drơ̆ng nơ̆r jang hơ dai, hơ dai hăm ‘noh hơ tŏk loi dơ̆ng pơ ma dơ nuh păng tơ ƀơ̆p băl đơ̆ng nghị sỹ vă pơ ma dơ nuh tơ drong hlôh vao găh khôi luơ̆t, hơ tŏk loi dơ̆ng hlôh vao, lui ngeh dih băl.

Thuem: Tơ blơ̆