VOV4.Bahnar - Kiơ̆ tơ drong jang đơ̆ng hop akŏm, ‘năr 29/9, Kơ dră Kuô̆k hô̆i Vương Đình Huệ păng Khul tang măt Kuô̆k hô̆i plt Hải Phòng tơ ƀâp bơ ngai tăh hla tơ̆ apŭng Thủy Nguyên, plt Hải Phòng adrol kơ hop akŏm mă 4, Kuô̆k hô̆i jăl 15. 

Kơ dră Kuô̆k hô̆i Vương Đình Huệ tơ ƀâp bơ ngai tăh hla tơ̆ plt Hải Phòng

Tơ̆ jơ tơ ƀâp, lơ bơ ngai tăh hla tơ̆ apŭng Thủy Nguyên, plt Hải Phòng tơ ƀôh đon lui, hơ iă hăm tơ drong jơ nei jang tŏk đơ̆ng tĕh đak; tơ drong chĕp kơ̆l pơ gơ̆r đơ̆ng Đảng, Kuô̆k hô̆i, Khul kơ dră tĕh đak tơ̆ hơ năp dôm tơ drong mơ mat tat yoa đơ̆ng jĭ Covid-19 mă lei hlôi chĕp kơ̆l pơ gơ̆r tĕh đak bơ̆ jang iŏk đei lơ tơ drong tôch hơ iă. Kuô̆k hô̆i đei lơ tơ drong Tơ chơ̆t tơ tom, lăp ‘lơ̆ng vă hơ met pơ ‘lơ̆ng dôm tơ drong mơ mat tat đơ̆ng kon pơ lei păng anih tĕch mơ dro.

Tơl nơ̆r ăn bơ ngai tăh hla găh jang pơ gang, lơ̆m nŏh athei Kuô̆k hô̆i đei trong vei lăng kơ jă pơ gang, pơm ‘lơ̆ng, pơ truh măh mai pơ gang hơ met jĭ, Kơ dră Kuô̆k hô̆i Vương Đình Huệ akhan, khei ‘năr âu ki, đei lơ tơ drong yoa đơ̆ng kơ dih ưh kơ chăng păng đơ̆ng nai hai jing đei tơ drong ‘nâu. Kuô̆k hô̆i, Khul kơ dră tĕh đak oei chĕp kơ̆l pơ gơ̆r kiơ̆ trong vei lăng ‘lơ̆ng, măh mai pơ gang, jô̆ hloi hăm kơ jă pơ gang hơ met jĭ.

VOV-Dơ̆ng tơ blơ̆