VOV4.Bahnar - Tơ̆ hnam Kuô̆k hô̆i, Kơ dră Kuô̆k hô̆i Vương Đình Huệ tơ ƀâp đe drŏ kăn pơm bơ ngai tang măt jang kơ tă lơ̆m Kuô̆k hô̆i tơ̆ Trung ương păng drŏ kăn chĕp kơ̆l, vei lăng dôm anih jang kơ Kuô̆k hô̆i ƀlep ƀât Năr apŭng plenh tĕh kơ đe drŏ kăn 8/3. Kơ dră Kuô̆k hô̆i Vương Đình Huệ hôn bơ nê, tơ chĕng ‘lơ̆ng dôm tơ drong adrin ưh đei pơ dơ̆h đơ̆ng đe bơ ngai tang măt Kuô̆k hô̆i, lơ̆m nŏh đei đe drŏ kăn pơm bơ ngai tang măt jang kơ tă lơ̆m Kuô̆k hô̆i jăl XV. Hăm Kuô̆k hô̆i, dôm jăl jang âu ki, Kuô̆k hô̆i Việt Nam ling lang đei kơ sô̆ drŏ kăn pơm bơ ngai tang măt lơ ƀiơ̆ kơ dôm tĕh đak lơ̆m tơ ring păng apŭng plenh tĕh; tơ drong rơ gei păng hơ năp jang đơ̆ng đe drŏ kăn pơm bơ ngai tang măt Kuô̆k hô̆i roi đunh roi tŏk.

Tơ̆ hơ năp dôm tơ drong ‘mĕh vă đơ̆ng tơ drong jang kơ tĕh đak lơ̆m khei ‘năr jang tŏk ‘nao, Kơ dră Kuô̆k hô̆i Vương Đình Huệ athei: Đĭ đăng drŏ kăn pơm bơ ngai tang măt bơ̆ jang kơ tă lơ̆m Kuô̆k hô̆i tơ̆ Trung ương păng drŏ kăn chĕp kơ̆l, vei lăng dôm anih jang kơ Kuô̆k hô̆i hơ nơ̆ng hŏk pơ hrăm, hơ tŏk đon rơ gei, tơ gop pơm hơ tŏk hlŏh dơ̆ng tơ drong đei yoa đơ̆ng tơ drong jang kơ Kuô̆k hô̆i; vang jang ‘lơ̆ng lơ̆m tơ drong tơ lĕch trong jang vei lăng tơ drong đei yoa ăn drŏ kăn păng đe hơ iŏh, bơ̆ jang kiơ̆ trong pơm hơ tŏ băl kơ plăh drŏ kăn hăm drŏ nglo, jang đang ‘lơ̆ng hơ năp jang đơ̆ng Bơ ngai tang măt ăn kon pơ lei, tơ găl hăm đon lui, ‘mêm đơ̆ng bơ ngai tăh hla păng kon pơ lei lơ̆m tĕh đak.

Dơ̆ng: Tơ blơ̆