VOV4.Bahnar - Tơ̆ Hnam Kuô̆k hô̆i Hungary, lơ̆m ‘măng năm hơ pong tơ̆ Hungary, Kuô̆k hô̆i Việt Nam păng Kuô̆k hô̆i Hungary pơ gơ̆r pơ ma đam găh chih pơ jing luơ̆t ‘măng mă 4 hăm hơ năn “Hơ met pơ kĕh luơ̆t kăt tơ jur kơ chơ̆t ‘mê̆ ‘măch pơm ăn plei tĕh roi tŏ, jang unh hơ yuh păng mŭk drăm rơ gŏh ‘lơ̆ng”. Kơ dră Kuô̆k hô̆i Vương Đình Huệ păng Kơ dră Kuô̆k hô̆i Hungary László Kövér vang pơ gơ̆r pơ ma đam. 

Tơ̆ jơ pơ ma đam, dôm bơ ngai tang măt Kuô̆k hô̆i, bơ ngai juăt jang kơ 2 tĕh đak pơ ma nuh tôch tơ păt găh dôm tơ drong đei tơ lĕch, dôm tơ drong nol kăl đei sek tơ lang vă chih pơ kĕh luơ̆t tang găn kơ chơ̆t ‘mê̆ ‘mach, pơm ăn plei tĕh roi tŏ, jang unh hơ yuh rơ gŏh, trong jang mŭk drăm kơ jăp ‘lơ̆ng, hơ yuh tŏ ‘mi kial tơ plih păng luơ̆t jang mŭk drăm rơ gŏh ‘lơ̆ng.

Pơ ma tơ̆ âu, Kơ dră Kuô̆k hô̆i pơ ma hơ dăh, Việt Nam vă hơ nơ̆ng bơ̆ jang hơ bĕch hơ băl, pran kơ jăp tôm tơ drong, năng kăl tơ drong jang pơm tơ lĕch unh hơ yuh rơ gŏh păng atŏk tơ iung anih jang, trong nơ năm lăp hăm tŏ ‘mi kial tơ plih, năng ‘nâu jĭ tơ drong ‘lơ̆ng vă jang tŏk kiơ̆ trong rơ gŏh ‘lơ̆ng, tơ lĕch cacbon tŏ sĕt păng kơ jăp đunh.

Dơ̆ng: Tơ blơ̆