VOV4.Bahnar - Kơ sơ̆ ‘năr 2/8, tơ̆ hnam Quốc hội, Kơ dră Quốc hội Vương Đình Huệ hlôi sơng Kơ dră Anih jang jơ̆p plĕnh teh Grŭp jang jên hu Hana Hàn Quốc Kim Jung Tai. Kơ dră Quốc hội Vương Đình Huệ hôn bơ nê tơ drong tơ chơ̆t đơ̆ng Hana lơ̆m tơ drong kĭ drơ̆ng nơ̆r tơ mơ̆t jên jang 35% cổ phần jên akŏm đei đơ̆ng BSC (bơ̆ jang pơm hla ar tơ mơ̆t jên jang jên tơ drong jang tơ̆ Kŏng ti cổ phần Chứng khoán BIDV); akhan ‘nâu jĭ tơ drong tơ chơ̆t đei đunh đai, tơ drong ‘nâu tơ ƀôh tơ drong lui ngeh đơ̆ng rim bơ ngai tơ mơ̆t jên jang teh đak đe pơ ma atŭm kŭm nhen hơ mĕng mŭk drăm đơ̆ng Việt Nam. Kơ dră Quốc hội pơ ma hơ dăh Quốc hội Việt Nam ling lang răp mơ̆ng vă hơ nơ̆ng chih pơ keh khôi luơ̆t, trong jang tơ gŭm, pơm tơ drong hiôk ‘lơ̆ng hloh ăn rim tơ drong jang mŭk drăm, bơ ngai tơ mơ̆t jên jang, lơ̆m noh đei dôm bơ ngai tơ mơ̆t jên jang Hàn Quốc roi ‘năr roi pơ̆ih să tơ mơ̆t jên jang, tĕch mơ dro jơ nei tơ̆ Việt Nam.

Thuem: Tơ blơ̆