VOV4.Bahnar - Kơ sơ̆ ‘năr 22/4, ƀok Marc Knapper, Kơ dră tang măt ‘nao kơ teh đak Mi tơ̆ Việt Nam truh kơ kuh pơ ma dơ nuh păng bơ̆ jang hăm Kơ dră chĕp kơ̆l pơ lei tơm Đà Nẵng. Kơ dră tang măt Marc Knapper lăng ‘lơ̆ng hơ nih tơ mơ̆t jên jang kơ Đà Nẵng. Ƀok Marc Knapper tơ băt hlôi pơ jing Anih bơ̆ jang tơ̆ Đà Nẵng Khŭl jang mơ dro sa Mi tơ̆ Việt Nam. ‘Moi kiơ̆ Khŭl jang âu, tơ̆ hơ năp kơnh, gô đei lơ bơ ngai tơ mơ̆t jên jang Mi truh tơ̆ Đà Nẵng tơ chă tơ drong hiôk jang sa, yua kơ Đà Nẵng jĭ hơ nih tơ mơ̆t jên jang đe ư hơ nhang đei apŭng plĕnh teh ‘meh vă.

Kơ dră tang măt Mi Marc Knapper kơ kuh pơ ma dơ nuh hăm Kơ dră chĕp kơ̆l pơ lei tơm Đà Nẵng

Pơ lei tơm Đà Nẵng đei bơ ngai jang đei pơ tho jang hơ gei, đei tơ nŏk đak dơ sĭ jrŭ, cham gre păr apŭng plĕnh teh păng anih jang kăl hơ iă ăn dôm bơ ngai tơ mơ̆t jên jang. Kơ dră tang măt  Marc Knapper pơ kăp gô pơ trŭt dôm bơ ngai tơ mơ̆t jên jang Mi truh tơ mơ̆t jên jang, ưh khan lăp pơm tơ drong hiôk ăn dôm anih jang mơ dro sa jang sa mă oei tơ gop ăn tơ drong hơ nŭk hơ noa atŭm kơ kon pơ lei Đà Nẵng. Ƀok Nguyễn Văn Quảng, Bí thư anih jang Đảng pơ lei tơm Đà Nẵng athei hăm hơ năp jang đơ̆ng kơ dih, ƀok kơ dră tang măt gô pơ trŭt ‘lơ̆ng hloh dôm tơ drong pơ vei đơ̆ng Khŭl jang dôm anih mơ dro sa Mi tơ̆ Việt Nam hăm pơ lei tơm Đà Nẵng.

Thuem: Tơ blơ̆