VOV4.Bahnar - Kơ sơ̆ 21/7, tơ̆ Anih jang kơ ƀok Kơ dră, Kơ dră tĕh đak Nguyễn Xuân Phúc, Kơ dră jang lơ̆m Anih tơm Chinh trĭ, Kơ dră chĕp kơ̆l Anih pơ gơ̆r jang “Trong jang gĭt kăl pơ jing păng hơ met pơ ‘lơ̆ng Tĕh đak chĕp kơ̆l pơ gơ̆r kiơ̆ luơ̆t xã hội chủ nghĩa Việt Nam truh sơ năm 2030, trong jang truh sơ năm 2045” pơ gơ̆r jang bơ̆ jang hăm Ban Nội chính Trung ương păng Khul kơ dră pơ gơ̆r chih hơ met, dôm bơ ngai juăt jang, bơ ngai jang khoa hŏk găh hơ met pơ ‘lơ̆ng Tơ drong jang ‘nâu.

Pơ ma nơ̆r pơ tho lơ̆m jơ bơ̆ jang, Kơ dră tĕh đak Nguyễn Xuân Phúc tơ chĕng ‘lơ̆ng Ban Nội chính Trung ương, dôm bơ ngai jang khoa hŏk, bơ ngai juăt jang găh luơ̆t vang pơ ma nuh tơ păt ‘lơ̆ng, trŏ ƀlep găh dôm tơ drong lơ̆m tơ drong jang; atŭm hăm ‘nŏh chih răk đon adrin, bơ̆ jang tơ năp đơ̆ng Khul chih hơ met tơ drong jang. Găh 1,2 tơ drong ‘nao đei lơ̆m tơ drong jang, Kơ dră tĕh đak pơ ma hơ dăh athei tơ blang mă lăp, kơ jăp ‘lơ̆ng, rơ đăh rơ đong. Dôm hla ar chih athei rơ đăh ‘lơ̆ng, kơ jăp găh luơ̆t păng chinh trĭ. Kơ dră tĕh đak athei Khul chih hơ met tơ drong jang mơ̆ng rim nơ̆r tơ gop lơ̆m jơ bơ̆ jang, jăh hơ len năng, chih pơ kĕh dơ̆ng dôm tơ drong kăl lơ̆m tơ drong jang vă hơ nơ̆ng chă iŏk nơ̆r tơ gop lơ̆m Hop akŏm mă 4 kơ Anih pơ gơ̆r jang.

Dơ̆ng: Tơ blơ̆