VOV4.Bahnar - Hơ nơ̆ng tơ drong bơ̆ jang tơ̆ Thanh Hóa, pơ gê ‘năr 29/8, Kơ dră teh đak Nguyễn Xuân Phúc pơ gơ̆r jơ bơ̆ jang hăm Khŭl chĕp kơ̆l pơ gơ̆r Anih jang Đảng dêh char Thanh Hóa. Vang truh akŏm đei Phŏ Thủ tướng teh đak Lê Văn Thành, kơ dră chĕp kơ̆l 1,2 anih tơm, anih jang. Iung pơ ma tơ̆ jơ bơ̆ jang, Kơ dră teh đak Nguyễn Xuân Phúc tơ roi tơ drong kăl sơ năm 2029 jĭ  1.000 sơ năm hơ năn krao Thanh Hóa. Yua thoi noh, Đảng bộ, khŭl kơ dră chĕp kơ̆l dêh char kăl kơ tơ chĕng hơ len, pơm tơ drong hơ tŏk tơ iung ‘lơ̆ng tôm tơ drong yak truh tơ băt tơ drong gĭt kăl kơ tơ ring teh ƀĕnh tơ drong joăt joe jơ hnơr arih âu.

Kơ dră teh đak Nguyễn Xuân Phúc pơ gơ̆r jơ bơ̆ jang hăm Khŭl chĕp kơ̆l Anih jang Đảng dêh char Thanh Hóa

Kơ dră teh đak akhan, tơ drong hơ tŏk tơ iung đơ̆ng Thanh Hóa hrei ‘nâu tam mă tơ găl hăm jơ hnơr arih hơ tŏk tơ iung kŭm nhen tơ drong đei yua ‘lơ̆ng kơ dêh char. Kơ dră teh đak athei dêh char hơ drin tơ gĕch iŏk ‘lơ̆ng dôm trong jang tơ gŭm hơ drô̆ đei Trung ương drơ̆ng ăn vă jang tŏk. Mă loi ‘noh, Kơ dră teh đak Nguyễn Xuân Phúc tơ tă, hơ tŏk tơ iung mŭk drăm athei tơ klep kơ jăp hăm hơ tŏk tơ iung joh ayŏ păng jang kiơ̆ ‘lơ̆ng, hơ tŏ hơ nơ̆ng lơ̆m tơ pôl. Vei răk păng hơ tŏk tơ drong ‘lơ̆ng joh ayŏ tơ ring, tơ iung tơ drong chhôk hơ iă hơ drĕch hơ drŭng, hơ pơi ‘meh hơ tŏk tơ iung pơ lei pơ la, teh đak.

Thuem: Tơ blơ̆