VOV4.Bahnar - Kơ sơ̆ 24/5, Kơ dră tĕh đak Nguyễn Xuân Phúc đei jơ bơ̆ jang hăm Grŭp chih hơ met Tơ drong jang “Chih pơ jing păng hơ met pơ ‘lơ̆ng tĕh đak chĕp kơ̆l pơ gơ̆r kiơ̆ khôi luơ̆t xã hội chủ nghĩa Việt Nam truh sơ năm 2030, trong jang truh sơ năm 2045".

Jơ bơ̆ jang đơ̆ng Kơ dră tĕh đak Nguyễn Xuân Phúc

Pơ ma lơ̆m jơ bơ̆ jang, Kơ dră tĕh đak tơ chĕng ‘lơ̆ng đon adrin păng đon jang tơ năp đơ̆ng dôm bơ ngai jang lơ̆m Khul chih hơ met tơ drong jang, dôm hla ar chih găh tơ drong jang tôch lăp, trŏ năr đơ̆ng Anih pơ gơ̆r jang tơ lĕch; ƀok athei Khul chih hơ met lăng kiơ̆ dôm tơ drong tơ chĕng hơ len đơ̆ng dôm anih jang, nơ̆r tơ gop đơ̆ng Anih pơ gơ̆r vă hơ met pơ ‘lơ̆ng Tơ drong jang.

Lơ̆m nŏh akŏm jơ hngâm pơm hơ dăh tơ drong tơm đơ̆ng tơ drong jang; chih hơ dăh rim tơ drong vă jang păng tơ lĕch trong jang đơ̆ng dang ei truh sơ năm 2030 păng đơ̆ng 2030 truh 2045; tơ ƀôh hơ dăh tơ drong chĕp kơ̆l pơ gơ̆r Đảng, trong jang kiơ̆ xã hội chủ nghĩa, tơ drong pơm tơm đơ̆ng kon pơ lei lơ̆m tơ drong pơ jing, hơ met pơ ‘lơ̆ng Tĕh đak chĕp kơ̆l pơ gơ̆r kiơ̆ luơ̆t xã hội chủ nghĩa Việt Nam.

Dơ̆ng: Tơ blơ̆