Pơ gê 3/11, Kơ dră tĕh đak Nguyễn Xuân Phúc sơng Bơ ngai tang măt ăn tĕh đak Dôm tơ ring Ả rập jing mĭnh (UAE) Obaid Saeed Al Dhaheri truh tơ klăh ti ƀât tôch jăl jang tơ̆ Việt Nam. Kơ dră tĕh đak Nguyễn Xuân Phúc hơ iă hăm Bơ ngai tang măt jang ‘lơ̆ng jăl jang tơ̆ Việt Nam, atŭm hăm ‘nŏh tơ chĕng ‘lơ̆ng dôm tơ drong tơ gop đơ̆ng Bơ ngai tang măt lơ̆m tơ drong pơm hơ tŏk tơ drong pơ vei, jang hơ doi lơ tơ drong đơ̆ng Việt Nam păng tĕh đak Dôm tơ ring Ả-rập jing mĭnh (UAE).

Việt Nam tơ chĕng ‘lơ̆ng hơ năp jang đơ̆ng UAE tơ̆ tơ ring păng dôm hop akŏm lơ pang. Vă hơ tŏk tơ drong pơ vei, jang hơ doi đơ̆ng 2 păh, Kơ dră tĕh đak athei 2 păh tơ lĕch lơ trong jang nhen hơ tŏk tơ drong pơ gơ̆r ăn khul tơ ƀâp, pơ ma nuh, mă loi hăm khul jang tih; jang hơ doi vang pơ gơ̆r dôm tơ drong jang chinh trĭ, mŭk drăm păng jŏh ayŏ kơ dŏ xoang năm truh ‘măng tơ băt 30 sơ năm pơ jing tơ drong pơ vei, jang tơ bôl đơ̆ng 2 tĕh đak lơ̆m sơ năm 2023; adrin jang hơ doi păng tơ gŭm băl lơ̆m rim hop akŏm, anih jang lơ̆m apŭng plenh tĕh păng tơ̆ tơ ring.