VOV4.Bahnar - ‘Năr 22/2, tơ̆ Anih jang kơ ƀok Kơ dră tĕh đak, Kơ dră tĕh đak bơ̆n Nguyễn Xuân Phúc tơ ƀâp kơ dră chĕp kơ̆l păng dôm bơ ngai jang khoa hŏk, bơ ngai juăt jang mŭk drăm lơ̆m Khul jang Khoa hŏk mŭk drăm Việt Nam.

Hăm tơ drong juăt đơ̆ng 47 sơ năm pơ jing păng jang tŏk, Kơ dră tĕh đak hơ pơi ‘mĕh Khul jang Khoa hŏk mŭk drăm Việt Nam pơ ma adrô̆, dôm bơ ngai jang khoa hŏk lơ̆m tĕh đak pơ ma atŭm athei năm hơ drol 1 hơ yak lơ̆m tơ drong tơ chĕng hơ len vă hơ nơ̆ng hơ met pơ ‘lơ̆ng dôm tơ drong tơ hlăk lơ̆m tơ drong jang mŭk drăm đơ̆ng rŏng 35 sơ năm tơ plih ‘nao, đơ̆ng nŏh bơ̆ jang đei yoa ‘lơ̆ng tơ drong Tơ chơ̆t mă XIII kơ Đảng păng đon hơ pơi ‘mĕh tĕh đak pơ drŏng, pran kơ tang lơ̆m sơ năm 2045.

Khul jang Khoa hŏk mŭk drăm Việt Nam pơ jing sơ năm 1975. Mĭnh lơ̆m dôm tơ drong jang tơm đơ̆ng Khul ‘nŏh jĭ hơ tŏk dôm tơ drong jang roi tơ ƀôh, tơ lĕch trong jang păng tơl tơ blang ăn tơ pôl, pơm lăp hăm tơ drong ‘mĕh vă đơ̆ng kơ dră chĕp kơ̆l pơ gơ̆r dôm anih jang păng dôm tơ ring. Mă loi vang bơ̆ jang kiơ̆ trong jang Gĭt kăl đunh đai păng 5 sơ năm truh kiơ̆ tơ drong Tơ chơ̆t đơ̆ng Hop akŏm mă XIII kơ Đảng.

Dơ̆ng: Tơ blơ̆