VOV4.Bahnar - Gơ măng 28/4, tơ̆ dêh char Thừa Thiên Huế, Trung ương Jơ nŭm ‘long pơ glang ƀrê Việt Nam jang hơ doi hăm Dơ nŏ anih vei lăng kon pơ lei dêh char pơ gơ̆r tơ lĕch khei jang ‘mêm mơ nat sơ năm 2022 hăm hơ năn “Tơ guăt tơ pôl – Tơ iung tơ drong jang ‘mêm mơ nat” păng tơ băt Năr ‘long pơ glang ƀrê- khei tơ ƀang apŭng plenh tĕh (8/5). Kơ dră tĕh đak Nguyễn Xuân Phúc truh akŏm păng iung pơ ma lơ̆m jơ pơm lêh. Khei jang ‘mêm mơ nat sơ năm 2022 pơ tơm đơ̆ng ‘năr 01/5 truh ‘năr 31/5, lơ̆m Jơ nŭm adrin krao hơ vơn mong đei 400 ti hlak jên vă tơ gŭm ăn 1 triu ‘nu bơ ngai đei tơ drong arih xa mơ mat tat, lơ̆m nŏh đei 100.000 anih jang ‘mêm mơ nat.

Kăl loi, tơ̆ lêh tơ lĕch khei jang ‘mêm mơ nat sơ năm 2022, Jơ nŭm ‘long pơ glang ƀrê Việt Nam tơ lĕch 2 tơ drong jang tơm vă bơ̆ jang lơ̆m 5 sơ năm truh, ‘nŏh jĭ tơ drong jang: “Vei sơ đơ̆ng ăn kon pơ lei jang ka tơ nuh, mơ mat tat” păng “Kơ chơ̆t bek ăn hơ iŏh tơ nuh, jơ jăn”. Pơ ma lơ̆m jơ pơm lêh, Kơ dră tĕh đak Nguyễn Xuân Phúc krao hơ vơn dôm anih jang, khul grŭp, anih tĕch mơ dro, dôm bơ ngai đei đon ‘lơ̆ng păng kon pơ lei hơ nơ̆ng bơ̆ jang tơ gŭm, yak hơ doi hăm Jơ nŭm ‘long pơ glang ƀrê Việt Nam, pơ jing tơ pôl 1 ƀơ̆r đon, ƀĕnh jơ hngâm đon ‘lơ̆ng, yoa tơ pôl tưk tơ iung tơ drong ‘mêm kơ eng. 

Dơ̆ng: Tơ blơ̆