VOV4.Bahnar - Lơ̆m ‘măng năm bơ̆ jang tơ̆ dôm dêh char tơ ring Tây Nam bộ, pơ gê 7/4, Kơ dră tĕh đak Nguyễn Xuân Phúc truh ngôi, hơ iă têt Chôl Chnăm Thmây tơ̆ Hnam hŏk Lui Phât Nam tông Khmer, pơm tơ̆ kuơ̆n Ô Môn, plt Cần Thơ. Hnam hŏk Lui phât Nam tông Khmer tơ̆ plt Cần Thơ đei pơ jing sơ năm 2006 vă pơ tho ăn bơ ngai Khmer lui phât tơ̆ jăl hŏk cử nhân.

Iŏk đơ̆ng pơ jing truh dang ei, Hnam hŏk hlôi pơ tho đei 5 jăl hăm hlŏh 200 ‘nu bơ ngai hŏk đang cử nhân lui Phật, tơ gop pơm hơ tŏk tơ drong hlôh vao, rơ gei ăn bơ ngai lui, đe ƀok pơ tho, ƀok pơ gơ̆r tơ̆ dôm Hnam chuơ Khmer tơ ring Tây Nam Bộ.

Hăm jơ hngâm đon chơt hơ iă vă sơng Tết Chôl Chnăm Thmây, pơ ma tơ̆ Hnam hŏk, Kơ dră tĕh đak Nguyễn Xuân Phúc hmach thơ thou ăn đe ƀok pơ tho lui Phât, bơ ngai kiơ̆ lui phât Nam tông Khmer; atŭm hăm ‘nŏh pơ truh nơ̆r jet gia, hmach thơ thou têt ăn đĭ đăng kon pơ lei kiơ̆ lui phât Khmer sơng Tết Chôl Chnăm Thmây sơ năm 2022 prang jăng grăng hơ kâu, sơ đơ̆ng ‘lơ̆ng liĕm, hiôk chơt.

Dơ̆ng: Tơ blơ̆