VOV4.Bahnar - Lơ̆m tơ drong jang tơ̆ Quảng Nam, Kơ dră teh đak Nguyễn Xuân Phúc vang truh păng iung pơ ma tơ̆ hop akŏm Hơ tŏk sâm Ngọc Linh jing hơ năn ‘lơ̆ng kơ teh đak. Iung pơ ma tơ̆ hop akŏm, Kơ dră teh đak Nguyễn Xuân Phúc mĭnh ‘măng dơ̆ng pơ ma hơ dăh đon lui  gơh hơ nhăk tơ mam gĭt kơ teh đak sâm Ngọc Linh jing trong jang tơ gŭm tơ drong arih sa  kon pơ lei, jĭ tơ drong hơ mĕng ‘nao kơ Việt Nam lơ̆m tơ drong jang pơ gang hla ‘long păng tơ mam rơ goh ‘lơ̆ng. Hăm tơ mam lơ, anih tĕch mơ dro păng kơ jă đơ̆ng Sâm Ngọc Linh, Kơ dră teh đak akhan, Việt Nam đei tơ drong hiôk vă hơ tŏk tơ iung 1 anih jang kơ măy kơ mŏk pơ tăm păng pơm tơ lĕch Sâm Ngọc Linh đơ̆ng Việt Nam hăm hơ găt kơ ti đô-la kơ jă pơm tơ lĕch păng tĕch tơ̆ teh đak đe lơ̆m dôm jĭt sơ năm truh. Vă jang kiơ̆ tơ drong hơ găt âu, Kơ dră teh đak akhan, kăl kơ tơ drong tơ gŭm đơ̆ng khŭl kơ dră teh đak, rim anih tơm, anih jang hăm rim tơ ring păng anih jang mơ dro sa. Kơ dră teh đak pơ ma hơ dăh kăl kơ hơ tŏk tơ iung hơ năn sâm Ngọc Linh jĭ hơ năn kơ teh đak mă ưh khan hơ drô̆ ‘noh hơ năn kơ 1 tơ mam dăh mă kơ anih jang mơ dro sa.

Thuem: Tơ blơ̆