VOV4.Bahnar - Pơ gê 10/6, tơ̆ dêh char Quảng Nam, Kơ dră tĕh đak Nguyễn Xuân Phúc pơ gơ̆r hop akŏm tơ gop nơ̆r ăn Tơ drong jang “Trong pơ jing păng hơ met pơ ‘lơ̆ng tĕh đak chĕp kơ̆l pơ gơ̆r kiơ̆ luơ̆t xã hội chủ nghĩa Việt Nam truh sơ năm 2030, trong jang truh sơ năm 2045” chă iŏk nơ̆r tơ gop đơ̆ng dôm anih jang đảng dêh char, plt tơ̆ tơ ring Tŏk bŏk - Tây Nguyên. ‘Nâu jĭ hop akŏm ‘măng mă 2 đơ̆ng rŏng kơ hop akŏm mă mă 1 tơ̆ Quảng Ninh đunh kơ dâu 3,4 năr.

Pơ ma lơ̆m hop akŏm, Kơ dră tĕh đak Nguyễn Xuân Phúc akhan, dôm anih jang đảng dêh char, plt hlôi pơ ma tơ lĕch lơ nơ̆r tôch tơ năp ‘lơ̆ng, tơ păt, kon pơ lei pơm tơm ăn dôm tơ drong kăl đơ̆ng tơ drong jang. Tơ drong tơ gop ƀơm truh rim tơ drong kăl vă pơ jing păng hơ met pơ ‘lơ̆ng tĕh đak chĕp kơ̆l pơ gơ̆r kiơ̆ luơ̆t XHCN Việt Nam. Dôm tơ drong kăl đei chih tơ mât lơ̆m tơ drong jang hlôi tơ ƀôh hơ dăh tơ drong tơm; dôm tơ drong jang, trong vă jang đei chih tôch rơ đăh, lăp hăm yăn âu.

Kơ dră tĕh đak akhan, dôm nơ̆r tơ gop tơ ƀôh hơ dăh jơ hngâm đon kăch mang, đon hơ pơi ‘mĕh tôch tơ găl vă tơ gop ăn tơ drong jang tơ plih ‘nao păng jang tŏk kơ tĕh đak. ‘Nâu kŭm jing tơ drong ‘lơ̆ng vă kơ dră chĕp kơ̆l Đảng, tĕh đak, chĕp kơ̆l pơ gơ̆r jang ‘lơ̆ng tơ drong pơ jing păng hơ met pơ ‘lơ̆ng tĕh đak chĕp kơ̆l pơ gơ̆r kiơ̆ luơ̆t XHCN kơ kon pơ lei, đơ̆ng kon pơ lei, yoa kon pơ lei, yoa Đảng chĕp kơ̆l.

Dơ̆ng: Tơ blơ̆