VOV4.Bahnar - Ƀlep ƀơ̆t tơ băt 81 sơ năm năr joăt joe Bơ ngai kră Việt Nam (06/6), pơ gê 5/6, Kơ dră teh đak Nguyễn Xuân Phúc hlôi năm tơ mang, asong tơ mam tơ drong jang bơ ngai kră jang mŭk drăm hơ gei tơ̆ Hơp tak xăh Tân Minh Đức, xăh Phạm Trấn, apŭng Gia Lộc, dêh char Hải Dương; năm tơ mang, asong tơ mam ăn bơ ngai tang măt bơ ngai kră tơ̆ dêh char Hải Dương. Tơ mang păng asong tơ mam ăn kon pơ lei, bơ ngai jang lơ̆m Hơp tak xăh âu, Kơ dră teh đak Nguyễn Xuân Phúc tơ ƀôh jơ hngơ̆m đon chơt hơ iă lăng ƀôh tơ drong jơ nei đơ̆ng hơp tak xăh Tân Minh Đức-mĭnh anih jang mơ dro sa đei dôm bơ ngai chĕp kơ̆l ‘noh jĭ bơ ngai kră jang mŭk drăm hơ gei. Mă kăl ‘noh, Kơ dră teh đak lăng ‘lơ̆ng Hơp tak xăh hlôi tơ mơ̆t yua tơ drong jang pơm tơ lĕch păng vei lăng đei yua, iŏk đei lơi 1,7 ti hlak jên 1 hek tar, sơng đei lơ bơ ngai jang lơ̆m khŭl vang jang. Đang kơ ‘noh, Kơ dră teh đak hlôi năm tơ mang, pơ lung, asong tơ mam ăn Khŭl jang tang măt Bơ ngai kră păng 15 ‘nu bơ ngai kră hơ gei kơ dêh char Hải Dương.

Thuem: Tơ blơ̆