VOV4.Bahnar - Kơ sơ̆ ‘năr 2/8, Kơ dră teh đak Nguyễn Xuân Phúc bơ̆ jang hăm kơ dră chĕp kơ̆l dêh char Đồng Nai. Đơ̆ng rŏng kơ dră chĕp kơ̆l rim anih tơm, anih jang tơ roi nơ̆r tơ gop, pơ ma tơ̆ tơ̆ jơ bơ̆ jang, Kơ dră teh đak Nguyễn Xuân Phúc pơ ma hơ dăh hơ năp jang đơ̆ng Đồng Nai păng akhan tơ drong jang kơ măy kơ mŏk ‘nao teh đak bơ̆n gô hiơ̆ tơ dăh ưh kơ đei hơ năp jang tưk tơ iung chông trong đơ̆ng Đồng Nai păng 1,2 tơ ring lơ̆m Tơ ring jang mŭk drăm tơm găh Pơ băh. Kơ dră teh đak athei Đồng Nai kăl kơ tơ chă dôm tơ drong ‘lơ̆ng, tơ drong jang tŏk ‘nao, yua kơ tơ dăh hơ nơ̆ng pơ mơ̆ng lơ̆m tơ drong jang tŏk đơ̆ng dôm tơ drong jang ‘lơ̆ng so, yua kơ gô ưh kơ kĕ vă pơm ‘lơ̆ng păng chông ba jang tŏk kơ tơ ring.

Dêh char kăl tơ lĕch mŭk drăm kơ dih lơ̆m teh đak păng mŭk drăm jang hơ dai ƀlep anih dơ̆ng, pơm tơ drong hiôk lơ̆m gơh iŏk yua jên jang nhen tơ drong tơ chơ̆t đơ̆ng Đảng vă pơm tơ drong ‘lơ̆ng hơ tŏk tơ iung. Yua thoi noh, Đồng Nai kăl kơ tơ plih ‘nao pran kơ tang lơ̆m đon tơ chĕng păng bơ̆ jang, kăl kơ jing 1 tơ drong păr ang hơ tŏk tơ iung ăn rim tơ ring tơ jê̆ nhen Bình Phước, Bình Thuận, Lâm Đồng tơ plih yua kơ lăp pơ mơ̆ng lơ̆m pơ lei tơm Hồ Chí Minh.

Thuem: Tơ blơ̆