VOV4.Bahnar - Kơ dră tĕh đak Nguyễn Xuân Phúc ‘nao đei jơ bơ̆ jang hăm Khul kơ dră chĕp kơ̆l Đảng dêh char Hưng Yên. Pơ ma nơ̆r pơ tho lơ̆m jơ bơ̆ jang, Kơ dră tĕh đak Nguyễn Xuân Phúc tơ ƀôh lơ tơ drong ‘lơ̆ng đơ̆ng Hưng Yên, ‘nŏh jĭ oei ƀât tŏk bŏk tơ ring tĕh tơ măn đak krong Hồng, tĕh ‘lơ̆ng; găh Tơ ring kơ drâm kơ anih Tơm, trong yak hiôk hian đei lơ tơ drong ‘lơ̆ng vă hơ tŏk anih tĕch mơ dro.

Kơ dră tĕh đak Nguyễn Xuân Phúc iung pơ ma lơ̆m jơ bơ̆ jang

Lơ̆m trong jang atŏk tơ iung truh âu kơnh, Kơ dră tĕh đak drơ̆ng nơ̆r hăm Đảng ƀô̆ dêh char găh tơ drong chă rơih vă jang tŏk ‘nŏh jĭ pơ jing păng vei lăng jang tŏk kiơ̆ trong tơ prŏh jang đơ̆ng dêh char; atŏk tơ iung anih jang mŭk drăm, tơ pôl, tơm hlŏh jĭ pơm trong gre; pơ jing khul kăn ƀô̆ gơ̆h hơ gei, đei hŏk jrŭ păng khul bơ ngai jang rơ gei.

Kơ dră tĕh đak Nguyễn Xuân Phúc oei pơ ma hơ dăh găh mŭk drăm tŏk pran, thu mong jên ăn tĕh đak iŏk đei jơ nei ‘lơ̆ng, hơ drô̆ sơ năm ‘nâu pơ hlom năng đei truh 51 rơ bâu ti, tôch gĭt kăl. Vă bơ̆ jang đei dôm tơ drong jang hlôi đei tơ lĕch, Kơ dră tĕh đak Nguyễn Xuân Phúc athei Đảng ƀô̆ dêh char Hưng Yên păng rim anih jang chinh trĭ đei đon adrin dêh hlŏh dơ̆ng vă rim chi ƀô̆, rim bơ ngai vang bơ̆ jang.

VOV/Dơ̆ng tơ blơ̆