VOV4.Bahnar - Pơ gê 4/8, Anih tơm vei lăng Công an pơm lêh sơng iŏk hơ năn Khul linh tơ blăh nuih mơng kơ kon pơ lei chăl ‘nao ăn 1 khul linh jang srĕp kơ Công an kon pơ lei. Kơ dră tĕh đak Nguyễn Xuân Phúc pơ jao hơ năn Khul linh tơ blăh kơ tang ăn kon pơ lei.

Pơ ma lơ̆m jơ pơm lêh, Kơ dră tĕh đak Nguyễn Xuân Phúc pơ ma hơ dăh, tơ drong sơng iŏk hơ năn Khul linh nuih mơng âu ‘nŏh jĭ tơ drong hơ iă tôch tih đơ̆ng đĭ đăng khul linh Công an kon pơ lei pơ ma atŭm păng Khul linh jang srĕp kơ Công an kon pơ lei pơ ma adrô̆; pơ ma hơ dăh tơ drong chih răk tôch tơ găl đơ̆ng Đảng, tĕh đak lơ̆m tơ drong adrin, plang jơ hngâm ưh đei hli gleh hrat đơ̆ng khul linh jang srĕp kơ Công an kon pơ lei.

Kơ dră tĕh đak Nguyễn Xuân Phúc lui khul linh jang srĕp Công an kon pơ lei gô tŏk pran hlŏh dơ̆ng, jing khul linh gĭt kăl, đei lui kiơ̆ kơ jăp, tơ găh hăm đon lui, tơ drong ‘mêm kơ eng đơ̆ng Đảng, tĕh đak păng kon pơ lei, “jing măt, jing đon" Đảng nhen Ƀok Hô ‘mêm kơ eng pơ tho sơ̆.

Dơ̆ng: Tơ blơ̆