VOV4.Bahnar - Kơ sơ̆ ‘năr 21/6, Kơ dră Teh đak Nguyễn Xuân Phúc kŭm hăm Khŭl tang măt Kuôk hô̆i pơ lei tơm Hồ Chí Minh hlôi tơ ƀơ̆p pơ ma dơ nuh hăm bơ ngai tăh hla ‘noh Bơ ngai jang lơ̆m Anih jang Mặt trận Tổ quốc Việt Nam pơ lei tơm, dôm bơ ngai hơ gei, hŏk jrŭ, bơ ngai vei lăng găh tơ drong lui, bơ ngai đei đe lui yom, hơ gei lơ̆m kon pơ lei kơ rim hơ drĕch hơ drŭng, khŭl joh hơ ri hơ soang tơ̆ pơ lei tơm Hồ Chí Minh. Răp mơ̆ng nơ̆r tơ gop đơ̆ng bơ ngai tăh hla, Kơ dră teh đak Nguyễn Xuân Phúc lăng ‘lơ̆ng dôm bơ ngai tăh hla tơ roi lơ tơ drong gĭt kăl kơ pơ lei tơm Hồ Chí Minh păng teh đak, pơ đĭ hloi găh tơ drong lui, pơ tho pơ hrăm, mŭk drăm, joh ayŏ, cham char, tang găn sa pơ jĭp... Lăng ‘lơ̆ng dôm nơ̆r tơ gop đơ̆ng dôm bơ ngai tăh hla, Kơ dră teh đak Nguyễn Xuân Phúc tơ roi rơ dăh, tơ drong tơm 2045 hơ nhăk teh đak bơ̆n jing teh đak hơ tŏk tơ iung iŏk yua lơ ‘noh jĭ long nol tôch kơ tih, athei đei tơ drong vang tơ gŭm, 1 jơ hngơ̆m đon tơ gop đơ̆ng rim răih tơ tôl, đơ̆ng bơ ngai hơ gei, hŏk jrŭ, bơ ngai joh hơ ri hơ soang, bơ ngai vei lăng găh tơ drong lui kŭm nhen đĭ đăng ŭnh hnam dôm hơ drĕch hơ drŭng Việt Nam. Kơ dră teh đak pơ ma hơ dăh, ƀơ̆t teh đak tơ ƀơ̆p mơ mat tat, tơ gop đơ̆ng bơ ngai gơh hơ gei sa roi đei ‘lơ̆ng hơ iă.

Thuem: Tơ blơ̆