VOV4.Bahnar - Gơ măng ‘năr (24/2) kiơ̆ jơ tơ ring, gre păr chơ Kơ dră Teh đak  Nguyễn Xuân Phúc păng hơ kăn sư kŭm hăm Khŭl kơ dră gĭt kăl Việt Nam hlôi truh tơ̆ cham gre păr apŭng plĕnh teh Changi, pơ tơm tơ drong jang ‘măng năm tơ mang tơ̆ Singapore. Sơng Kơ dră teh đak, Hơ kăn sư păng Khŭl tơ̆ cham gre păr, găh păh Singapore đei Kơ dră tơm jang tơ bôl Vivivan Balakrishnan, Kơ dră tang măt Singapore tơ̆ Việt Nam Jaya Ratnam. Găh păh Việt Nam đei Kơ dră tang măt Việt Nam tơ̆ Singapore Mai Phước Dũng, kang ƀô̆ păng bơ ngai kơ Anih jang tang măt Việt Nam tơ̆ Singapore.

Kiơ̆ tơ drong jang, lơ̆m jơ năr năm tơ mang, Kơ dră teh đak Nguyễn Xuân Phúc gô đei ‘măng pơ ma dơ nuh hăm Kơ dră tơm Halimah Yacob, pơ ma đam hăm Thủ tướng Lý Hiển Long, pơ ma dơ nuh hăm Kơ dră Kuôk hô̆i Tan Chuan-Jin. Dôm ‘măng tơ ƀơ̆p kơ dră kơ pal âu vă pơ trŭt jang hơ dai 2 teh đak hlôi kĭ pơ kăp, pơ ma dơ nuh dôm tơ drong jang hơ dai ‘nao, jang ‘lơ̆ng hloh dơ̆ng tơ drong pơ vei jang hơ dai Việt Nam-Singapore. Dôm anih tơm, anih jang, anih mơ dro sa 2 teh đak kŭm hlôi pơ ma dơ nuh dôm hla ar jang hơ dai lơ̆m dôm tơ drong jang muk drăm, mơ dro sa, khŭl linh, kơ tơ̆ng ang păng tơ roi tơ băt, khoa hŏk kơ măy kơ mŏk....

Thuem: Tơ blơ̆