VOV4.Bahnar - Pơ gê ‘năr 6/6, tơ̆ pơ lei tơm Hạ Long, dêh char Quảng Ninh, Kơ dră teh đak Nguyễn Xuân Phúc, Kơ dră Anih pơ gơ̆r jang pơ jing tơ drong jang pơ gơ̆r Hop akŏm tơ gop nơ̆r đơ̆ng rim anih jang đảng dêh char, pơ lei tơm găh Trung ương (tơ ring găh tu) hăm tơ drong jang  pơ jing păng chih pơ keh teh đak chĕp kơ̆l pơ gơ̆r kiơ̆ Luơ̆t xã hội chủ nghĩa Việt Nam truh sơ năm 2030, trong vă jang truh sơ năm 2045”. Tơ̆ Hop akŏm, dôm anih jang đảng dêh char, pơ lei tơm tơ ring găh tu drơ̆ng nơ̆r hăm dôm tơ drong ‘lơ̆ng đei tơ roi lơ̆m tơ drong jang, lơ̆m noh đei hơ tŏk loi dơ̆ng tơ drong klăih song kơ chư̆k jang, hơ dai hăm athei kăl kơ pơm rơ đăh hloh lơ̆m Tơ drong jang găh tơ drong pơ vei đơ̆ng teh đak hăm khŭl kơ dră tơ ring păng trong jang hơ dăh hơ tŏk loi dơ̆ng klăih song kơ chư̆k jang hrơ̆ch 1 ‘măng, hơ tŏk ‘lơ̆ng pơm tơm kơ dih, pŭ hơ năp jang kơ dih.

Pơ ma pơ tôch Hop akŏm, Kơ dră teh đak Nguyễn Xuân Phúc lăng ‘lơ̆ng  dôm anih jang đảng dêh char, pơ lei tơm tơ ring găh tu hlôi đei lơ nơ̆r tơ gop ‘lơ̆ng păng drơ̆ng lăp hăm hla ar chih ming tơ drong jang, hơ dai hăm athei rim anih jang đảng dêh char, pơ lei tơm hơ nơ̆ng tơ chĕng hơ len tơ drong jang vă đei lơ nơ̆r tơ gop hăm hla ar chih ming tơ drong jang.

Thuem: Tơ blơ̆