VOV4.Bahnar - Gơ măng ‘năr 8/5, tơ̆ Hnam hơ ri tih Hà Nội, Jơ nŭm rim khŭl Joh ayŏ kơ dŏ soang Việt Nam păng Khŭl chih tơ drong pơ đơ̆k Việt Nam pơ gơ̆r Lêh pơ jao mê đai rơ ngei hiôk hian mă 2 ăn bơ ngai chih pơ đơ̆k Hữu Thỉnh păng tơ drong jang joh ayŏ kơ dŏ soang “ Bơ ngai chih pơ đơ̆k Hữu Thỉnh – Jơ hngơ̆m kơ jăp kơ teh đak”. Kơ dră teh đak Nguyễn Xuân Phúc hlôi truh akŏm păng pơ jao mê đai rơ ngei hiôk hian mă 2 ăn bơ ngai chih pơ đơ̆k Hữu Thỉnh. Bơ ngai chih pơ đơ̆k Hữu Thỉnh rơ neh sơ năm 1942, hơ năn tơ pă ‘noh Nguyễn Hữu Thỉnh, hơ năn ư̆ Vũ Hữu, jĭ bơ ngai chih pơ đơ̆k, bơ ngai jang lơ̆m Khŭl chih tơ drong pơ đơ̆k Việt Nam đơ̆ng sơ năm 1976, Tổng thư ký păng Kơ dră Khŭl chih tơ drong pơ đơ̆k Việt Nam (4 jăl jang tơ til). Ƀok kŭm jing Bơ ngai tang măt Kuôk hô̆i jăl X păng jăl XI. Tơ mam hơ păh kăp gĭt đei iŏk ‘măng âu gô tưk tơ iung dơ̆ng đon hơ drin vă bơ ngai chih pơ đơ̆k Hữu Thỉnh hơ nơ̆ng tơ gop lơ hloh dơ̆ng, hơ dai hăm ‘noh pôk pơ ư dôm kơ jă  kăp gĭt joh ayŏ kơ dŏ soang mă bơ ngai chih pơ đơ̆k hlôi plang ăn tơ drong joh ayŏ teh đak bơ̆n lơ̆m hloh 60 sơ năm âu ki.

Thuem: Tơ blơ̆