VOV4.Bahnar - Kơ sơ̆ ‘năr 12/8, tơ̆ Hà Nội, Anih tơm vei lăng Kŏng an pơ gơ̆r lêh pơ jao tơ drong tơ chơ̆t đơ̆ng kơ dră teh đak ăn kơ si kuan năm bơ̆ jang vei lăng rơ ngei Liên Hợp quốc păng tơ chơ̆t pơ jing anih bơ̆ jang kơ Anih tơm vei lăng Kŏng an găh vei lăng rơ ngei Liên hợp quốc. Jang kiơ̆ trong jang tŭn pran mơ̆t jang hơ dai apŭng plĕnh teh păng jang tơ bôl găh sơ đơ̆ng teh đak lơ̆m tơ drong jang vei lăng tơ drong rơ ngei, ‘năr 15/6/2021, Kơ dră Anih tơm vei lăng Kŏng an kĭ tơ chơ̆t pơ jing Anih bơ̆ jang kơ Anih tơm vei lăng Kŏng an găh vei lăng rơ ngei Liên Hợp quốc. Đơ̆ng rŏng kơ pơ jing, Anih bơ̆ jang hlôi jang hơ dai hăm Liên Hợp quốc pơ gơ̆r ăn 23 ‘nu si kuan vang pơ hrăm, chih măt bơ̆ jang vei lăng rơ ngei Liên Hợp quốc. Truh dang ei, Anih tơm vei lăng Kŏng an hlôi đei 8 ‘nu si kuan đei Liên Hợp quốc hơ len lăng, iŏk đei dôm tơ drong ‘meh vă găh vang jang lơ̆m khŭl linh vei lăng rơ ngei. Pơ ma tơ̆ jơ pơm lêh, Kơ dră teh đak Nguyễn Xuân Phúc tơ roi rơ đăh, tơ drong ăn khŭl linh vang bơ̆ jang vei lăng rơ ngei Liên hợp quốc ‘noh jĭ 1 hơ năp jang gĭt kăl, tơ gop jang kiơ̆ dôm nơ̆r pơ kăp, hơ năp jang đơ̆ng Teh đak  Việt Nam hăm tơ pôl apŭng plĕnh teh găh vei lăng rơ ngei lơ̆m apŭng plĕnh teh. ‘Măng âu, Kơ dră teh đak Nguyễn Xuân Phúc hlôi pơ jao tơ drong tơ chơ̆t đơ̆ng Kơ dră teh đak ăn kơ Trung tá Nguyễn Ngọc Hải bơ̆ jang tơ̆ anih jang Liên hợp quốc păng asong pơ kao hmach chơt hơ iă kơ 3 ‘nu bơ̆ jang hơ năp jang tơ̆ Nam Xu-đăng.

Thuem: Tơ blơ̆