VOV4.Bahnar - Lơ̆m jơ năr tơ̆ Nhật Bản vang pơm Lêh pơ dong nhap Thủ tướng Abe Shinzo, Kơ dră tĕh đak Nguyễn Xuân Phúc hlôi pơ ma đam hăm Thủ tướng Nhật Bản Kishida Fumio.

Kơ dră tĕh đak Nguyễn Xuân Phúc pơ ma đam hăm Thủ tướng Nhật Bản

Hăm jơ hngâm đon rơ hău, ‘mêm băt păng lui băl, 2 ‘nu kơ dră chĕp kơ̆l tơ ƀôh jơ hngâm đon tôch lăp tơ̆ hơ năp tơ drong tŏk ‘lơ̆ng, đei yoa tôm tơ drong đơ̆ng tơ drong pơ vei Việt Nam - Nhật Bản, atŭm hăm ‘nŏh drơ̆ng nơ̆r găh trong jang tih vă tưk tơ iung tơ drong pơ vei jang hơ doi Gĭt kăl tôm tơ drong Việt Nam - Nhật Bản năm truh ‘măng tơ băt 50 sơ năm pơ jing tơ drong pơ vei jang tơ bôl Việt Nam - Nhật Bản sơ năm 2023.

Ƀar ‘nu kơ dră chĕp kơ̆l drơ̆ng nơ̆r hơ nơ̆ng hơ tŏk đon lui băl găh chinh trĭ kiơ̆ đơ̆ng vei kơ jăp dôm ‘măng năm hơ pong tơ̆ băl, pơ gơ̆r tơ ƀâp tih; hơ tŏk tơ drong jang hơ doi găh jang tơ bôl, vei sơ đơ̆ng tĕh đak, jang mŭk drăm đei yoa ‘lơ̆ng; hơ tŏk tơ drong pơ gơ̆r tơ ƀâp ăn kon pơ lei, jŏh ayŏ kơ dŏ xoang, chă tơ mang lăng.

VOV.VN

Dơ̆ng: Tơ blơ̆