VOV4.Bahnar - Kơ sơ̆ ‘năr 23/3 tơ̆ anih jang kơ ƀok Kơ dră teh đak, Kơ dră teh đak Nguyễn Xuân Phúc hlôi pơ ma điên thoăi hăm Kơ dră tơm ‘nao pôk teh đak Hàn Quốc Yoon Suk-yeol. Tang măt Teh đak păng kon pơ lei Việt Nam, Kơ dră teh đak Nguyễn Xuân Phúc hlôi hmach chhôk hơ iă kơ ƀok Yoon Suk-yeol đei pôk pơm Kơ dră tơm mă 20 kơ Đại Hàn Dân Quốc; hơ dai hăm pơ trŭh nơ̆r apĭnh jet gia đơ̆ng Tổng Bí thư Nguyễn Phú Trọng păng dôm kơ dră chĕp kơ̆l Việt Nam truh Kơ dră tơm ‘nao pôk Yoon Suk-yeol. Kơ dră tơm ‘nao pôk Yoon Suk-yeol pơ ma hơ dăh ling lang lăng kăl tơ drong pơ vei hăm Việt Nam păng ‘meh vă 2 păh pơ trŭt tơ drong pơ vei hơ tŏk tơ iung hloh dơ̆ng tơ̆ hơ năp kơnh.

Kơ dră chĕp kơ̆l 2 teh đak drơ̆ng nơ̆r tơ̆ hơ năp kơnh gô vang hơ nơ̆ng pơ vei dôm tơ drong jang pơ ma dơ nuh đơ̆ng khŭl păng tơ ƀơ̆p pơ ma dơ nuh kơ dră kơ pal, rim kơ dră chĕp kơ̆l hăm lơ trong lăp lơ̆m khei ‘năr tơ drong ‘nao; tơ gŭm tơ drong hơ tŏk loi dơ̆ng jang hơ dai vei sơ đơ̆ng, khŭl linh păng kơ măy kơ mŏk khŭl linh; jang hơ dai kơ jăp tơ lĕch jang dôm tơ drong jang ‘măng tơ băt 30 sơ năm pơ jing tơ drong pơ vei jang tơ bôl Việt Nam-Hàn Quốc (1992-2022).

Thuem: Tơ blơ̆