VOV4.Bahnar - Lơ̆m ‘măng năm hơ pong tơ̆ tĕh đak Singapore, kơ sơ̆ 25/02 tơ̆ Hnam Kuô̆k hô̆i Singapore, Kơ dră tĕh đak Nguyễn Xuân Phúc pơ ma nuh hăm Kơ dră Kuô̆k hô̆i Singapore Tan Chuan-Jin. Kơ dră Kuô̆k hô̆i Tan Chuan-jin chơt hơ iă hăm ‘măng năm hơ pong đơ̆ng Kơ dră tĕh đak Nguyễn Xuân Phúc păng lăp đon hăm dôm tơ drong iŏk đei ‘lơ̆ng đơ̆ng dôm ‘măng tơ ƀâp, pơ ma nuh đơ̆ng Kơ dră tĕh đak Nguyễn Xuân Phúc hăm Kơ dră tơm Singapore Halimah Yacop păng Thủ tướng Singapore Lý Hiển Long, atŭm hăm ‘nŏh pơ truh nơ̆r hơ iă ăn Việt Nam hăm dôm tơ drong jơ nei đơ̆ng jang tŏk mŭk drăm, tơ pôl khei ‘năr âu ki mă đơ̆ng ƀơm ưh ‘lơ̆ng tôch dêh đơ̆ng jĭ Covid-19 ră.

Kơ dră tĕh đak Nguyễn Xuân Phúc pơ ma hơ dăh Việt Nam hơ nơ̆ng năng kăl păng hơ pơi ‘mĕh pơm hơ tŏk tơ drong pơ vei jang hơ doi Gĭt kăl hăm Singapore, athei 2 păh hơ tŏk tơ drong tơ gŭm băl tơ lĕch khôi luơ̆t vă tơ tom tơ gŭm ăn Khul kơ dră 2 tĕh đak lơ̆m tơ drong tang găn jĭ, hơ met pơ ‘lơ̆ng anih tơ mât jên jang, tĕch mơ dro vă tơ gŭm jang tŏk dơ̆ng mŭk drăm, tơ pôl lơ̆m khei ‘năr “oei krê kơ jĭ hơ buh”; tơ lĕch lơ trong jang hơ doi mă tơ găl hăm tơ drong jang hơ doi Gĭt kăl đơ̆ng 2 tĕh đak.

Dơ̆ng: Tơ blơ̆