VOV4.Bahnar - Tơ̆ hơ năp tơ drong kơ hret tơ̆ Ukraine, tơ drong jang tơ gŭm ăn kon pơ lei Việt Nam tơ̆ Ukraine iŏk đei tơ drong tôch tơ rĕk đơ̆ng kơ dră chĕp kơ̆l Đảng, tĕh đak bơ̆n. Kơ sơ̆ 6/3, tơ̆ Anih jang kơ ƀok Kơ dră tĕh đak, Kơ dră tĕh đak bơ̆n Nguyễn Xuân Phúc mơ̆ng Anih tơm jang tơ bôl păng dôm anih jang kơ pal tơ roi găh tơ drong ‘nâu. Kiơ̆ nơ̆r tơ roi đơ̆ng Anih tơm jang tơ bôl, hrei ‘nâu tơ̆ Ukraine đei 7.000 ‘nu bơ ngai Việt Nam. Lơ kon pơ lei chă năm kơ dih lĕch đơ̆ng dôm tơ ring tơ blăh vang năm tơ̆ tơ ring sơ lam nhen tơ̆ dôm tĕh đak tơ til Ba Lan, Hungary, Bulgaria.

Anih tơm jang tơ bôl bơ̆ jang hăm dôm anih jang kơ pal kơ tĕh đak Nga păng Ukraine, Liên Hợp quốc păng dôm tĕh đak mă kon pơ lei Việt Nam chă jăk vă vei lăng sơ đơ̆ng trong yak kŭm nhen sơ đơ̆ng tơ̆ anih truh oei pơ gia vă gơ̆h tơ tom tơ gŭm anih oei xa. Lơ̆m jơ bơ̆ jang, Kơ dră tĕh đak pơ ma hơ dăh, athei jang ‘lơ̆ng tơ drong jang tơ gŭm ăn kon pơ lei, ưh gơ̆h lê̆ kon pơ lei Việt Nam lôch, rơ ka tơ̆ Ukraine. Kơ dră tĕh đak hôn bơ nê Khul kơ dră tĕh đak đei trong ăn dôm ‘măng păr chơ đĕch kon pơ lei tơ ƀâp mơ mat tat păng ‘mĕh brŏk dơ̆ng tơ̆ tĕh đak; atŭm hăm ‘nŏh athei mưh pơ gơ̆r athei bơ̆ jang trŏ trong, tơ gŭm hơ drol ăn đe drŏ kăn, hơ iŏh păng bơ ngai kră.

Dơ̆ng: Tơ blơ̆