VOV4.Bahnar - Ƀlep ƀơ̆t tơ băt 77 sơ năm Kach mang Khei 8 păng Quốc khánh 2/9, 53 sơ năm năr ƀok Hồ lôch hơ chăng, hơ nơ̆ng tơ drong jang tơ̆ Tuyên Quang, pơ gê ‘năr 4/9, Kơ dră teh đak Nguyễn Xuân Phúc chông khŭl bơ̆ jang năm soh nhang, dan pơ kao ƀlŏk hơ dơ̆r kơ ƀok Hồ tơ̆ Lán Nà Nưa, lơ̆m Hơ nih gru groa gĭt kăl kơ Teh đak Tân Trào. Tơ̆ hơ năp rup ƀok Hồ, Kơ dră teh đak Nguyễn Xuân Phúc păng khŭl ‘măn pơ nĭt kŭp kơ̆l ƀlŏk hơ dơ̆r kơ ƀok Hồ. Kơ dră teh đak tơ ƀôh jơ hngơ̆m đon băt bơ nê tôch kơ dêh găh tơ drong jang tih tên đơ̆ng ƀok Hồ, bơ ngai chĕp kơ̆l gơh hơ gei, bơ ngai thây nuih mơng kơ kach mang Việt Nam, prăt jơ hnơr arih plang jơ hngơ̆m ăn tơ drong rơ gei hơ drĕch hơ drŭng, rơ ngei teh đak, ăn tơ drong hiôk hian, hơ nŭk hơ noa kơ kon pơ lei.

Kơ dră teh đak Nguyễn Xuân Phúc soh nhang ƀlŏk hơ dơ̆r kơ ƀok Hồ tơ̆ Lán Nà Nưa, Hơ nih gru groa gĭt kăl kơ teh đak Tân Trào

Đang kơ ‘noh, Kơ dră teh đak Nguyễn Xuân Phúc păng khŭl bơ̆ jang soh jang tơ̆ Hnam soi Tân Trào, pơm tơ̆ găh pơ mơ̆t plei Tân Lập, xăh Tân Trào, jĭ hơ nih pơ gơ̆r Hop akŏm khŭl tang măt ăn kon pơ lei lơ̆m teh đak, dang ei jĭ Kuôk hô̆i Việt Nam, lơ̆m ‘năr 16 khei 8 sơ năm 1945. Hop akŏm khul tang măt ăn kon pơ lei lơ̆m teh đak Tân Trào ‘noh jĭ 1 tơ drong jang kăl tơ ƀôh hơ iă lơ̆m jơ hnơr arih kach mang Việt Nam, tơ lĕch tơ drong iung tơ blăh tơ gar iŏk tơ drong chĕp kơ̆l pơ gơ̆r hrĕnh hloh, vă kon pơ lei jơ̆p lơ̆m teh đak iung chĕp kơ̆l pơ gơ̆r, vei lăng tơ drong arih sa păng teh đak kơ dih.

Kơ dră teh đak ‘meh vă dôm bơ ngai jang lơ̆m Kâu lak ƀô̆ băt kơ dih đei hơ năp jang găh tơ drong vei răk, tơ ƀăk mong kơ jă kăp gĭt đơ̆ng joh hơ ri Then

 Tơ̆ hnam joh ayŏ plei Tân Lập, xăh Tân Trào, Kơ dră teh đak Nguyễn Xuân Phúc kŭm hlôi năm ngôi, pơ lung dôm bơ ngai jang lơ̆m Kâu lak ƀô̆ Then plei Tân Lập xăh Tân Trào apŭng Sơn Dương. Kơ dră teh đak ‘meh vă dôm bơ ngai jang lơ̆m Kâu lak ƀô̆ băt kơ dih đei hơ năp jang găh tơ drong vei răk, tơ ƀăk mong kơ jă kăp gĭt đơ̆ng joh hơ ri Then, tơ drong joh ayŏ kăp gĭt hlôi đei UNESCO chih hơ năn.

Thuem: Tơ blơ̆