VOV4.Bahnar - ‘Năr 5/8, tơ̆ Anih jang kơ ƀok Kơ dră tĕh đak, Kơ dră tĕh đak bơ̆n Nguyễn Xuân Phúc sơng bơ ngai tang măt ăn Nam Phi Vuyiswa Tulelo, Bơ ngai tang măt ăn Saudi Arabia Mohammed Ismaeil A.Dahlwy, Bơ ngai tang măt ăn tĕh đak Bỉ Karl Hendrik Margareta Van Den Bossche truh gơih Kơ thơ tĕh đak.

Kơ dră tĕh đak Nguyễn Xuân Phúc sơng bơ ngai tang măt ăn Nam Phi Vuyiswa Tulelo

Sơng bơ ngai tang măt ăn Nam Phi, yă Tulelo, Kơ dră tĕh đak Nguyễn Xuân Phúc pơ ma hơ dăh, Việt Nam năng Nam Phi jĭ “Tĕh đak jang hơ doi păng jang tŏk” gĭt kăl tơ̆ tơ ring. Kơ dră tĕh đak hơ pơi ‘mĕh 2 păh hơ nơ̆ng jang hơ doi păng tơ gŭm băl tơ̆ dôm khul grŭp lơ pang. Việt Nam ‘mĕh tơ gŭm ăn Nam Phi hơ tŏk tơ drong jang hơ doi hăm ASEAN; hơ pơi ‘mĕh Nam Phi tơ gŭm păng jang hơ doi kơ jăp vă tưk tơ iung tơ drong jang hơ doi Việt Nam - châu Phi kiơ̆ Jơ nŭm châu Phi.

Sơng bơ ngai tang măt ăn tĕh đak Saudi Arabia, Ismaeil A.Dahlwy, Kơ dră tĕh đak Nguyễn Xuân Phúc pơ ma hơ dăh, hăm Việt Nam, Saudi Arabia jĭ 1 lơ̆m dôm tĕh đak jang hơ doi mŭk drăm, tĕch mơ dro, tơ mât jên jang tơm tơ̆ tơ ring Trung Đông păng hơ pơi ‘mĕh Bơ ngai tang măt tưk tơ iung hlŏh dơ̆ng tơ drong jang hơ doi mŭk drăm đơ̆ng 2 păh.

Dơ̆ng: Tơ blơ̆