Jơ tơ ƀâp đơ̆ng 2 ‘nu ƀok Kơ dră

Kơ dră tĕh đak Nguyễn Xuân Phúc chơt hơ iă hăm Kơ dră Thượng viện chĕp kơ̆l Khul tang măt ăn Thượng viện Campuchia năm hơ pong ngôi tơ̆ Việt Nam, pơ ma hơ dăh ƀok Kơ dră Samdech jĭ bơ ngai boăl tôch juăt hăm Việt Nam. Bơ nê Kơ dră tĕh đak Nguyễn Xuân Phúc ‘măn jơ sơng khul, ƀok Samdech Kơ dră Thượng viện Campuchia pơ ma hơ dăh ‘măng năm hơ pong mă âu tơ gop pơm hơ tŏk hlŏh dơ̆ng tơ drong pơ vei ‘lơ̆ng hơ iă đơ̆ng sơ̆ kơ 2 tĕh đak.

Kơ dră tĕh đak Nguyễn Xuân Phúc sơng Kơ dră Thượng viện Campuchia, Samdech Say Chhum

Tơ roi truh tơ drong ‘lơ̆ng iŏk đei lơ̆m jơ pơ ma đam hăm Kơ dră Kuô̆k hô̆i Việt Nam Vương Đình Huệ, ƀok Samdech, Kơ dră Thượng viện Campuchia ăn tơ băt, 2 păh hlôi tơ lĕch lơ trong jang hơ doi đơ̆ng anih chih pơ jing luơ̆t ăn 2 tĕh đak tơ̆ hơ năp kơnh; kiơ̆ đơ̆ng noh vang hơ met kơ jăp păng pơm pơ ‘lơ̆ng hlŏh tơ drong jang hơ doi đơ̆ng 2 anih chih pơ jing luơ̆t. Ƀok Kơ dră Samdech oei tơ ƀôh đon bơ nê Việt Nam vang tơ gŭm ăn Campuchia ƀât oei iŏk jang kơ chư̆k pơm Kơ dră ASEAN 2022.