VOV4.Bahnar - Pơ gê ‘năr 18/10, tơ̆ Anih bơ̆ jang kơ ƀok Kơ dră teh đak, Kơ dră teh đak Nguyễn Xuân Phúc sơng Kơ dră tơm jang tơ bôl Hàn Quốc Park Jin năm ngôi tơ̆ Việt Nam, ƀlep ƀơ̆t ‘măng tơ băt 30 sơ năm pơ jing tơ drong pơ vei jang tơ bôl đơ̆ng 2 teh đak. Kơ dră teh đak Nguyễn Xuân Phúc hôn bơ nê Kơ dră tơm năm ngôi tơ̆ Việt Nam, teh đak Đông Nam Á mă blŭng, lăp đơ̆ng rŏng kơ iŏk kơ chư̆k, hơ dai hăm pơ ma hơ dăh Đảng, teh đak păng kon pơ lei Việt Nam ling lang ‘meh vă hơ nhăk tơ drong pơ vei Việt Nam - Hàn Quốc hơ tŏk tơ iung hloh dơ̆ng hăm tơ drong lui ‘ngeh ‘lơ̆ng.

Jơ sơng pơ ma dơ nuh

Kơ dră teh đak pơ ma hơ dăh Việt Nam ling lang jĭ hơ nih năm truh sơđơ̆ng păng pơm hơ nih hiôk ăn rim anih jang mơ dro sa Hàn Quốc sơ đơ̆ng tơ mơ̆t jên jang đunh đai. 2 păh kŭm kăl kơ hơ drin iŏk đei jên mơ dro sa 100 ti USD lơ̆m sơ năm đơ̆ng rŏng păng 150 ti USD lơ̆m sơ năm 2030 kiơ̆ trong hơ tŏ băl, lơ̆m noh Hàn Quốc hơ tŏk răt tơ mơ̆t lơ̆m Việt Nam. Kơ dră tơm jang tơ bôl Park Jin vang tơ gŭm dôm tơ drong hiong răm hăm kon pơ lei Việt Nam ‘nao đei ƀơm ưh kơ ‘lơ̆ng yua đơ̆ng ‘mi kial hơ bŭt, hơ dai hăm pơ ma hơ dăh Hàn Quốc ling lang lăng Việt Nam jĭ teh đak jang hơ dai găh tơ gŭm hơ tŏk tơ iung ODA.

VOV/Thuem tơ blơ̆