VOV4.Bahnar - Kơ sơ̆ 17/6, tơ̆ Anih jang kơ ƀok Kơ dră, Kơ dră tĕh đak bơ̆n Nguyễn Xuân Phúc sơng pơ ma nuh hăm yă Khemmani Pholsena, Kơ dră jang lơ̆m Trung ương Đảng, Kơ dră vei lăng anih jang kơ ƀok Kơ dră tĕh đak Lào. Kơ dră tĕh đak chơt hơ iă păng tơ chĕng ‘lơ̆ng dôm tơ drong jơ nei gĭt kăl, tôm tơ drong mă kon pơ lei Lào iŏk đei khei ‘năr âu ki.

Jơ sơng pơ ma nuh

Kiơ̆ Kơ dră tĕh đak Nguyễn Xuân Phúc, 2 anih jang kơ ƀok Kơ dră tĕh đak athei hơ tŏk tơ drong jang hơ doi, roi tơ băt ăn băl lơ tơ drong kăl, đei yoa vă hơ tŏk hlŏh dơ̆ng tơ drong ‘lơ̆ng đơ̆ng jang hơ doi, vang tơ gŭm ăn Kơ dră tĕh đak, Phŏ Kơ dră tĕh đak, tơ gop ‘lơ̆ng ăn trong jang đơ̆ng 2 Đảng, 2 tĕh đak. Ƀar anih jang kơ ƀok Kơ dră tĕh đak athei hơ tŏk tơ drong tơ mât yoa kơ măy kơ mŏk sô̆ vă jang ‘lơ̆ng tơ drong jang roi tơ ƀôh, tơ gŭm ăn tơ drong jang đơ̆ng Kơ dră tĕh đak, Phŏ Kơ dră tĕh đak, jang ‘lơ̆ng hlŏh dơ̆ng tơ drong pơm lêh sơng, pơ vih pơ văn ăn kơ dră chĕp kơ̆l tĕh đak păng dôm kơ dră chĕp kơ̆l tih.

Dơ̆ng: Tơ blơ̆