VOV4.Bahnar - ‘Năr 4/8, tơ̆ Anih jang kơ dră teh đak, Kơ dră teh đak Nguyễn Xuân Phúc sơng Kơ dră vei lăng dêh char Gunma, Nhật Bản, ƀok Yamamoto Ichita năm tơ mang păng bơ̆ jang tơ̆ Việt Nam. Kơ dră teh đak Nguyễn Xuân Phúc chơt hơ iă tơ băt, ƀok Yamamoto Ichita jĭ Kơ dră vei lăng tơ ring mă blŭng kơ Nhật Bản tơ mang tơ̆ Việt Nam đơ̆ng rŏng jĭ COVID-19, pơ gơ̆r dơ̆ng tơ drong tơ ƀơ̆p pơ ma dơ nuh rim tơ ring 2 teh đak păng yak truh tơ băt 50 sơ năm tơ drong pơ vei jang tơ bôl Việt Nam-Nhật Bản lơ̆m sơ năm 2023.

Kơ dră teh đak Nguyễn Xuân Phúc sơng Kơ dră vei lăng dêh char  Gunma, Nhật Bản

Kơ dră teh đak tơ roi rơ đăh, dang ei Nhật Bản hơ nơ̆ng jing teh đak jang hơ dai mŭk drăm tih hloh kơ Việt Nam, jĭ teh đak asong tơ gŭm ODA lơ hloh, bơ ngai tơ mơ̆t jên jang tih gĭt kăl mă pêng păng jang hơ dai mơ dro sa mă 4 kơ Việt Nam. Kơ dră teh đak lăng ‘lơ̆ng tơ drong hơ drin đơ̆ng Kơ dră Yamamoto Ichita lơ̆m pơ trŭt pơ vei hăm Việt Nam khei ‘năr âu ki; mă loi ‘noh jĭ tơ drong jang hơ dai pơ gơ̆r Tết Việt Nam păng tơ gŭm tơ pôl bơ ngai Việt Nam tơ̆ dêh char yak hloh mơ mat tat yua đơ̆ng jĭ COVID-19.

Thuem: Tơ blơ̆