VOV4.Bahnar - Kơ sơ̆ 21/9, tơ̆ Anih jang kơ ƀok Kơ dră tĕh đak, Kơ dră tĕh đak bơ̆n Nguyễn Xuân Phúc đei jơ tơ ƀâp 45 ‘nu bơ ngai tang măt ‘nŏh jĭ đe đảng viên, bơ ngai đei kon pơ lei lui yom dơ̆ng tang ăn hlŏh 20 hơ drĕch kon kông tơ̆ dêh char Cao Bằng. Pơ ma lơ̆m jơ tơ ƀâp, Kơ dră tĕh đak pơ ma hơ dăh, ‘nâu jĭ dôm bơ ngai rơ gei đei tơ drong jang gĭt kăl lơ̆m tơ drong pơ jing anih jang chinh trĭ tơ̆ tơ ring, vei kơ jăp tơ drong sơ đơ̆ng, hơ tŏk tơ drong tơ guăt hơ drĕch hơ drung, vei kơ jăp tơ drong jŏh ayŏ kơ dŏ xoang kơ dôm hơ drĕch kon kông, jing gơng tơ ƀưh đơ̆ng Khul kơ dră tơ ring hăm kon pơ lei.

Jơ tơ ƀâp hăm Kơ dră tĕh đak

Tơ̆ hơ năp kơnh, Kơ dră  tĕh đak hơ pơi ‘mĕh Đảng ƀô̆, Khul kơ dră tơ ring păng dôm bơ ngai tang măt ăn kon pơ lei kon kông jang rơ gei dêh char Cao Bằng hơ nơ̆ng bơ̆ jang tơ drong jang tơ jur tơ nuh hin. Vă tơ ring groi kông druh kiơ̆ tom tơ ring tơ hnă, dôm bơ ngai tang măt rơ gei ăn kon pơ lei kon kông dêh char Cao Bằng tưk tơ iung tơ drong juăt jang đơ̆ng pơ lei pơ la kăch mang, jĭ dôm bơ ngai gơ̆h hơ gei, hơ nơ̆ng tơ ƀôh jơ hngâm đon ‘mêm băl, đon adrin lơ̆m tơ drong arih xa, tơ gop ăn pơ lei pơ la, tĕh đak.

Dơ̆ng: Tơ blơ̆