VOV4.Bahnar - Ƀlep ƀơ̆t tơ băt 40 sơ năm Năr pơ jing păng hơ met ăn Hop akŏm IX jăl jang 2022- 2027 kơ grŭp vei lăng găh ming man Việt Nam, kơ sơ̆ ‘năr 5/7, tơ̆ anih jang kơ ƀok Kơ dră teh đak, Kơ dră teh đak Nguyễn Xuân Phúc tơ ƀơ̆p muh măt Khŭl tang măt ăn hloh 7.000 ‘nu bơ ngai jang, khŭl tơ pôl, kơ dih kơ Grŭp vei lăng ming man Việt Nam. Pơ ma tơ̆ jơ tơ ƀơ̆p, tang măt kơ dră chĕp kơ̆l Đảng, teh đak, Kơ dră teh đak pôk pơ ư dôm tơ drong hơ drin, tơ gop đơ̆ng Grŭp vei lăng ming man Việt Nam lơ̆m 40 sơ năm âu ki hăm tơ drong jang pơ jing păng hơ tŏk tơ iung teh đak.

Kơ dră teh đak athei Grŭp vei lăng hơ tŏk tơ drong joăt joe 40 sơ năm, hơ vơn khŭl jang dôm bơ ngai khoa hŏk păng joăt jang lơ̆m teh đak păng sơng đei lơ lap khŭl jang hơ gei bơ ngai Việt Nam oei tơ̆ teh đak đe vă hơ tŏk ‘lơ̆ng tơ drong jang. Hơ dai hăm hơ tŏk ‘lơ̆ng roi tơ ƀôh, hơ len lăng păng pơ ma tơ blang ăn tơ pôl lơ̆m tơ drong jang ming man; jang tơ gŭm ăn Đảng păng teh đak dôm tơ drong găh tơ drong jang hơ tŏk tơ iung ƀơm truh nhen hnam oei, anih kơ drơ̆m, anih jang kơ măy kơ mŏk, dôm anih jang kăl mŭk drăm - tơ pôl, dôm tơ drong găh hnam, anih jang, chĕng hơ met teh vei sơ đơ̆ng ‘lơ̆ng tơ drong joăt oei sa Việt.

Thuem: Tơ blơ̆