VOV4.Bahnar - Ƀlep ƀơ̆t tơ băt 67 sơ năm Năr thây pơ gang Việt Nam, pơ gê ‘năr 27/2, Kơ dră teh đak Nguyễn Xuân Phúc tơ ƀơ̆p muh măt Khŭl tang măt kang ƀô̆ jang pơ gang hơ gei lơ̆m teh đak. Tang măt kơ dră chĕp kơ̆l Đảng, teh đak, Kơ dră teh đak Nguyễn Xuân Phúc gơ̆ih truh 150 ‘nu tang măt thây pơ gang gơh hơ gei hloh lơ̆m tơ drong jang vei lăng jơ hngơ̆m pran kon pơ lei, hơ dai hăm ‘noh gơ̆ih nơ̆r apĭnh gia păng nơ̆r hmach chơt hơ iă ‘lơ̆ng hloh truh đĭ đăng kang ƀô̆, bơ ngai jang lơ̆m anih jang pơ gang.

Kơ dră teh đak apĭnh jet gia pơ ma dơ nuh hăm bơ ngai jang pơ gang

Kơ dră teh đak lăng ‘lơ̆ng anih jang pơ gang 67 sơ năm âu ki hlôi đei lơ jơ nei ‘lơ̆ng, jĭ 1 lơ̆m kơ sô̆ tŏ sĕt dôm teh đak đei tơ drong jang pơ gang tôm truh tơ̆ pơ lei pơ la, vei sơ đơ̆ng pơ truh tôm măh dôm tơ drong pơ vih pơ văn pơ gang ăn rim kon pơ lei. Kơ dră teh đak tơ tă truh khŭl thây pơ gang athei ưh kơ pơ dơh pơ hrăm đon hơ gei joăt jang vă pơm lăp hăm ‘meh vă hơ met jĭ ăn bơ ngai jĭ.

Thuem: Tơ blơ̆