VOV4.Bahnar - ‘Năr 12/5, Kơ dră teh đak Nguyễn Xuân Phúc păng dôm Bơ ngai tang măt Kuôk hô̆i anih jang kơ sô̆ 3 pơ lei tơm Hồ Chí Minh hlôi tơ ƀơ̆p pơ ma dơ nuh hăm bơ ngai tăh hla dôm Quận 5, 8 păng 11. Bơ ngai tăh hla dôm quận chih iŏk tơ drong tơ gŭm đơ̆ng Đảng, teh đak păng khŭl kơ dră chĕp kơ̆l pơ lei tơm lơ̆m tơ drong jang tang găn jĭ COVID-19, bơ̆ jang kiơ̆ dôm trong jang tơ gŭm vei lăng sơ đơ̆ng tơ drong arih sa tơ pôl vă kon pơ lei sơ đơ̆ng tơ drong arih sa.

Kơ dră teh đak Nguyễn Xuân Phúc pơ ma dơ nuh hăm dôm bơ ngai tăh hla

Dôm bơ ngai tăh hla bơ ngai Hoa, bơ ngai Chăm lơ̆m tơ ring kơ dôm quận âu tơ băt, khei ‘năr âu ki, khŭl kơ dră chĕp kơ̆l hlôi đei lơ trong jang bơ ngơ̆t truh tơ pôl bơ ngai Hoa, lơ̆m noh bơ ngơ̆t truh anih oei, pơ trŭt kon oh bơ ngai Hoa hŏk pơ hrăm... Dôm bơ ngai tăh hla ‘meh vă đei dơ̆ng lơ hnam trưng pơ tho nơ̆r Hoa ăn kơ kon oh bơ ngai Hoa; pơm tơ drong hiôk, bơ ngơ̆t truh vei lăng ăn kon pơ lei Chăm, mă loi ‘noh jĭ drŏ kăn, kon oh bơ ngai kon kông păng ‘meh đei Bơ ngai tang măt Kuôk hô̆i tang măt ăn bơ ngai tăh hla bơ ngai Chăm…

Thuem: Tơ blơ̆