VOV4.Bahnar - Ƀlep ƀât tơ băt 75 sơ năm Năr linh jĭ rơ ka – Linh lôch tang tĕh đak (27/7/1947 - 27/7/2022), pơ gê 26/7, Kơ dră tĕh đak Nguyễn Xuân Phúc truh Hop akŏm pôk pơ ư bơ ngai đei kŏng rơ gei lơ̆m khul linh Công an kon pơ lei đơ̆ng 2017-2022. Vang truh hop akŏm đei 461 ‘nu bơ ngai tang măt, dơ̆ng tang ăn dôm jĭt rơ bâu ‘nu linh jĭ rơ ka, kơ tum kơ tŏng linh lôch tang tĕh đak păng bơ ngai đei kŏng hăm kăch mang hlôi păng oei bơ̆ jang lơ̆m khul linh Công an kon pơ lei lơ̆m rim khei ‘năr.

Pơ ma lơ̆m hop akŏm, Kơ dră tĕh đak Nguyễn Xuân Phúc pơ truh nơ̆r ăn kăn ƀô̆ Công an kră, đe linh tơ blăh nuih mơng kơ kon pơ lei, linh bơ̆ jang nuih mơng, đe linh jĭ rơ ka, linh jĭ jăn, kơ tum kơ tŏng linh lôch tang tĕh đak, bơ ngai đei kŏng hăm kăch mang, dôm khul grŭp, rim bơ ngai đei jơ nei ‘lơ̆ng lơ̆m tơ drong jang tơ gŭm ăn bơ ngai đei kŏng kŭm hăm đĭ đăng kăn ƀô̆, linh Công an kon pơ lei jet ‘lơ̆ng hơ iă hlŏh, hăm ƀĕnh jơ hngâm đon ‘mêm bơ nê. Kơ dră tĕh đak pơ ma hơ dăh, Đảng, tĕh đak păng kon pơ lei bơ̆n ling lang băt bơ nê kơ đe linh lôch tang tĕh đak, linh jĭ rơ ka, bơ ngai đei kŏng hăm tĕh đak, đe linh hlôi lôch hŭt hơ kâu yao tơ drong tơ blăh iŏk rơ ngei hơ drĕch hơ drung, pơ jing păng vei lăng tĕh đak, vei kơ jăp tơ drong rơ ngei hiôk hian ăn tĕh đak.

Dơ̆ng: Tơ blơ̆