VOV4.Bahnar - Ƀlep ƀât vă sơng Têt Nguyên Đán Nhâm Dần, Kơ dră tĕh đak Nguyễn Xuân Phúc tang măt ăn kơ dră chĕp kơ̆l Đảng, tĕh đak truh ngôi, hơ păh tơ mam, pơ lung đe y ƀak si tơ̆ 1,2 hnam pơ gang lơ̆m plt Đà Nẵng jĭ Hnam pơ gang Đà Nẵng păng Hnam pơ gang C Đà Nẵng ‘nŏh jĭ dôm hnam pơ gang jang ‘lơ̆ng tơ drong khăm hơ met jĭ ăn kon pơ lei tơ̆ plt Đà Nẵng păng lơ dêh char đơ̆ng Nghệ An truh dôm dêh char Tây nguyên, atŭm hăm ‘nŏh kŭm jing dôm hnam pơ gang jang ‘lơ̆ng tơ drong chơ akŏm, hơ met ăn bơ ngai jĭ COVID-19.

Pôk pơ ư dôm Hnam pơ gang găh dôm tơ drong jang đei, Kơ dră tĕh đak Nguyễn Xuân Phúc ăn tơ băt, tam mă truh 20 năr dơ̆ng ‘nŏh truh Têt Nguyên Đán, Kơ dră tĕh đak hơ pơi ‘mĕh đe y ƀak si hơ tŏk dôm tơ drong hlôi iŏk đei, hơ nơ̆ng adrin pơ jing Hnam pơ gang tơ̆ Đà Nẵng jing Anih jang pơ gang gơ̆h hơ gei, pơm lăp hăm tơ drong ‘mĕh vă khăm hơ met jĭ ăn kon pơ lei, tơ gop vei lăng jơ hngâm pran, tơ drong hiôk chơt ăn kon pơ lei bơ̆n. Kơ dră tĕh đak pơ truh nơ̆r jet gia, pơ lung đơ̆ng đe kơ dră chĕp kơ̆l Đảng, tĕh đak ăn anih jang pơ gang plt Đà Nẵng, mă loi jĭ dôm hnam pơ gang hơ met jĭ ăn kon pơ lei, kăl hlŏh dơ̆ng nŏh jĭ dôm hnam pơ gang ƀơm truh tơ drong tang găn jĭ COVID-19 âu ki.

Dơ̆ng: Tơ blơ̆