VOV4.Bahnar - Pơ gê 19/5, tơ̆ Anih tơm vei lăng khul linh tĕh đak, Kơ dră tĕh đak Nguyễn Xuân Phúc truh pơm lêh hơ păh Tơ mam Hồ Chí Minh găh khoa hŏk, kơ măy kơ mŏk pơ yoa ăn khul linh, vei lăng tĕh đak. Tang măt ăn kơ dră chĕp kơ̆l Đảng, Tĕh đak, Kơ dră tĕh đak Nguyễn Xuân Phúc pơ jao Ƀăng chih tơ băt tơ mam hơ păh ăn dôm bơ ngai jang khoa hŏk vang chih pơ chĕh iŏk đei jơ nei.

Kơ dră tĕh đak Nguyễn Xuân Phúc pơ ma lơ̆m jơ pơm lêh hơ păh Tơ mam Hồ Chí Minh

Kơ dră tĕh đak Nguyễn Xuân Phúc pơ ma hơ dăh, 2 tơ drong pơ chĕh găh khul linh, vei lăng tĕh đak đơ̆ng 49 ‘nu bơ ngai chih pơ chĕh iŏk đei Tơ mam hơ păh Hồ Chí Minh ‘măng mă âu tôch kăp gĭt, ‘nŏh jĭ tơ drong iŏk đei đơ̆ng đon adrin tơ chĕng hơ len, đơ̆ng đon rơ gei kơ dôm bơ ngai jang khoa hŏk khul linh.

Ƀar tơ drong pơ chĕh găh khul linh, vei lăng tĕh đak đơ̆ng Grŭp jang kơ măy Viễn thông khul linh đei pơ jing kiơ̆ đơ̆ng khul grŭp kăn ƀô̆ jang khoa hŏk tơ̆ Grŭp jang, hăm lơ kăn ƀô̆ oei mơ lôh, đei hŏk pơ hrăm jrŭ kŭm hăm đon pơ ngơ̆t, chĕp kơ̆l pơ gơ̆r tôch kơ jăp, đei yoa đơ̆ng Quân ủy Trung ương, Anih tơm vei lăng khul linh tĕh đak, tơ drong tơ gŭm đơ̆ng dôm anih jang lơ̆m khul linh.

Dơ̆ng: Tơ blơ̆