VOV4.Bahnar - Gơ măng 19/8, Đảng ƀô̆ păng kon pơ lei apŭng Quế Sơn, dêh char Quảng Nam pơm lêh tih tơ băt 50 sơ năm Tơ blăh jơ nei Cấm Dơi. Vang truh pơm lêh đei Kơ dră tĕh đak Nguyễn Xuân Phúc, kơ dră chĕp kơ̆l dêh char Quảng Nam, quân khu 5, apŭng Quế Sơn, đe Mĕ Việt Nam nuih mơng, Bơ ngai tơ blăh nuih mơng kơ kon pơ lei, đe yŏng linh, đe linh so, dôm unh hnam đei kŏng hăm kăch mang, lơ kon pơ lei tơ̆ apŭng Quế Sơn.

Kơ dră tĕh đak Nguyễn Xuân Phúc kŭm hăm khul jang sŏh nhang, plang pơ kao tơ̆ Anih soi kơ đe linh lôch tang tĕh đak apŭng Quế Sơn

Đunh kơ âu 50 sơ năm, kŭm hăm tơ drong iung tơ blăh pran kơ tang đơ̆ng khul linh păng kon pơ lei tơ ring Pơ băh, hăm tơ drong chĕp kơ̆l pơ gơ̆r đơ̆ng Đảng, mă hơ dăh jĭ đơ̆ng Anih jang đảng Tơ ring 5 păng Anih jang đảng dêh char Quảng Nam, khul linh tơ blăh kơ Tơ ring 5 păng khul linh tơ blăh tơ̆ tơ ring yak hơ doi kŭm hăm kăn ƀô̆, linh Sư đoàn 711, Tiểu đoàn găh Quân khu 5, iung tơ blăh kơ tang nuih mơng, pơ jing đei lơ tơ drong jơ nei tih – tơ blăh tơ drŭt kơ đông Cấm Dơi, iŏk rơ ngei ăn tơ ring kơ drâm Quế Sơn, tơ gop ‘lơ̆ng ăn tơ drong tơ blăh iŏk rơ ngei dêh char Quảng Nam.

Chĕp vei kơ jăp tơ drong kơ tang nuih mơng lơ̆m khei ‘năr tơ blăh ayăt sơ̆, dôm sơ năm âu ki, Đảng ƀô̆ Quế Sơn hlôi chĕp kơ̆l pơ gơ̆r kon pơ lei bơ̆ jang iŏk đei lơ tơ drong jơ nei gĭt kăl. Tơ drong jang tŏk mŭk drăm pran păng sơ đơ̆ng, tơ drong jang xa đei tơ plih kiơ̆ trong roi ‘lơ̆ng.

Dơ̆ng: Tơ blơ̆