VOV4.Bahnar - Bơ ngai chă pơ ma tơ lĕch nơ̆r ăn Anih tơm jang tơ bôl Lê Thị Thu Hằng lơ̆m hop akŏm kơ sơ̆ ‘năr 22/9 tơ roi, Kơ dră tĕh đak Nguyễn Xuân Phúc vă tang măt ăn kơ dră chĕp kơ̆l Đảng, tĕh đak Việt Nam vang năm pơ dong nhap Thủ tướng so kơ tĕh đak Nhật Bản Abe Shinzo tơ̆ Tokio (Nhật Bản) đơ̆ng ‘năr 25-28/9.

Tơ drong Kơ dră tĕh đak Nguyễn Xuân Phúc dơ̆ng tang ăn kơ dră chĕp kơ̆l Đảng, tĕh đak Việt Nam vang năm pơm lêh pơ dong nhap Thủ tướng so Nhật Bản Abe Shinzo tơ ƀôh hơ dăh jơ hngâm đon ‘mêm băt đơ̆ng kơ dră chĕp kơ̆l, kon pơ lei Việt Nam hăm dôm tơ drong tơ gop đơ̆ng Thủ tướng so Abe Shinzo mưh pơm hơ tŏk tơ drong pơ vei kơ 2 tĕh đak, tơ ƀôh hơ dăh tơ drong năng kăl tơ drong pơ vei gĭt kăl ‘lơ̆ng hơ iă Việt Nam - Nhật Bản.

Lơ̆m khei ‘năr oei chĕp kơ̆l sơ̆, nhap Thủ tướng Nhật Bản Abe Shinzo đei 4 ‘măng năm hơ pong tơ̆ tĕh đak Việt Nam, ‘măn lơ jơ hngâm đon ‘lơ̆ng păng tơ drong tơ gop pơm hơ tŏk tơ drong pơ vei kơ 2 tĕh đak, tŏk ‘lơ̆ng lơ̆m rim tơ drong.

Dơ̆ng: Tơ blơ̆