VOV4.Bahnar - ‘Năr 12/4, Kơ dră teh đak Nguyễn Xuân Phúc vang Hop akŏm pơ trŭt tơ mơ̆t jên jang lơ̆m 2 apŭng Hóc Môn păng Củ Chi, pơ lei tơm Hồ Chí Minh. ‘Nâu jĭ hop akŏm pơ trŭt tơ mơ̆t jên jang tih hloh teh đak bơ̆n hăm tơ drong vang akŏm đơ̆ng 550 ‘nu bơ ngai tang măt, găh lơ ‘noh bơ ngai jang mơ dro sa. Tơ̆ hop akŏm, 2 apŭng Củ Chi păng Hóc Môn hlôi roi tơ ƀôh dôm tơ mam ‘lơ̆ng hơ tŏk tơ iung, dôm tơ drong ‘lơ̆ng hơ drô̆ đei păng krao hơ vơn tơ mơ̆t jên jang lơ̆m 55 tơ drong jang hăm akŏm jên hloh 285 rơ bâu ti hlak jên lơ̆m dôm tơ drong jang anih jang kăl hơ gei, hơ met ming anih kơ drơ̆m, kơ măy kơ mŏk, choh jang sa, mơ dro sa pơ vih pơ văn.

Lơ bơ ngai tơ mơ̆t jên jang đei pơ jao hla ar drơ̆ng ăn tơ mơ̆t jên hloi tơ̆ Hop a kŏm

Pơ ma tơ̆ Hop akŏm, hôn bơ nê kơ dôm anih jang mơ dro sa pơ kăp tơ mơ̆t jên jang lơ̆m Củ Chi păng Hóc Môn, Kơ dră teh đak Nguyễn Xuân Phúc pơ ma hơ dăh, ‘nâu jĭ dôm tơ ring đei lơ tơ drong ‘lơ̆ng hơ tŏk tơ iung, tơ ring tơ til hăm  Long An, Bình Dương, đei tơ drong gơh tơ ƀưh trong đak păng trong lĕch tơ̆ đak krong Sài Gòn. Kơ dră teh đak Nguyễn Xuân Phúc athei dôm bơ ngai tơ mơ̆t jên jang pơ ma năm hơ dai hăm jang, tơ tĕnh tơ lĕch jang tơ drong jang păng pơ ma ưh hăm tơ drong kơ nê̆, sa pơ jĭp. Kŭm hăm ‘noh pơ kăp vei lăng cham char, hơ năp jang tơ pôl păng kon pơ lei, tơ gop vei răk păng tơ ƀăk mong kơ jă kăp gĭt joh ayŏ.

Thuem: Tơ blơ̆