VOV4.Bahnar - Pơ gê ‘năr 30/8, tơ̆ Hà Nội, Kơ dră teh đak Nguyễn Xuân Phúc vang năm Hop akŏm ‘măng mă XI Jơ nŭm ‘long pơ glang ƀrê Việt Nam. Tơ̆ Hop akŏm, Jơ nŭm ‘long pơ glang ƀrê Việt Nam hlôi drơ̆ng nơ̆r pôk ƀok Nguyễn Xuân Phúc ‘noh jĭ pơm Kơ dră bưng ai kơ Jơ nŭm ‘long pơ glang ƀrê Việt Nam. 

Kơ dră teh đak Nguyễn Xuân Phúc phĭn rup kŭm hăm Khŭl chĕp kơ̆l Jơ nŭm ‘long pơ glang ƀrê Việt Nam jăl jang 2022-2027

Pơ ma tơ̆ Hop akŏm, Kơ dră teh đak Nguyễn Xuân Phúc pôk pơ ư, lăng ‘lơ̆ng Jơ nŭm ‘long pơ glang ƀrê Việt Nam hlôi hơ tŏk hơ năp jang tơm lơ̆m tơ drong jang ‘mêm mơ nat, tơ goăt rơ bâu  jơ hngơ̆m đon vang tơ gŭm vă păr ang, pơ̆ih să kơ triệu tơ drong jang ‘mêm mơ nat. Tơ roi dôm long nol hăm teh đak bơ̆n tơ̆ hơ năp kơnh, ƀok Nguyễn Xuân Phúc akhan, tơ drong ‘noh hơ nơ̆ng kăl tơ drong vang tơ gŭm, ‘mêm mơ nat đơ̆ng đĭ đăng tơ pôl,  hơ dai hăm kăl tơ drong tơ plih ‘nao tơ drong jang, trong bơ̆ jang đơ̆ng Jơ nŭm ‘long pơ glang ƀrê Việt Nam.

Thuem: Tơ blơ̆