VOV4.Bahnar - Lăp đơ̆ng rŏng kơ khŭl đă ƀŏng lŏng U23 Việt Nam đă jei 1 - 0 hơ drol kơ Khŭl đă ƀŏng lŏng U23 Thái Lan, iŏk đei jơ nei pran hloh môn đă ƀŏng lŏng drŏ nglo tơ̆ ‘Măng pơ long đă ƀŏng lŏng tơ plŏng kơ dâu Đông Nam Á (SEA Games 31), Kơ dră teh đak Nguyễn Xuân Phúc, Thủ tướng Phạm Minh Chính, Kơ dră Kuôk hô̆i Vương Đình Huệ păng Bơ ngai jang lơ̆m Anih tơm Chĭnh trĭ, chĕp kơ̆l pơ gơ̆r Ban Bí thư Võ Văn Thưởng hlôi jur tơ̆ cham hmach chơt hơ iă păng pơ jao Mê đai kong môn đă ƀŏng lŏng drŏ nglo asong ăn kơ dôm bơ ngai jang Khŭl pơ tho pơ hrăm păng dôm bơ ngai đă ƀŏng lŏng U23 Indonesia; pơ jao Mê đai hu asong ăn dôm bơ ngai jang lơ̆m Khŭl pơ tho pơ hrăm păng dôm bơ ngai đă ƀŏng lŏng U23 Thái Lan; păng pơ jao Mê đai măih asong ăn bơ ngai vei lăng pơ tho pơ hrăm Park-Hang-seo, dôm bơ ngai jang lơ̆m khŭl pơ tho đă ƀŏng lŏng păng dôm bơ ngai đă ƀŏng lŏng hlôi pơ jei băl đĭ jơ hngơ̆m vă hơ nhăk ăn ang hơ dăh ăn teh đak păng tơ drong chơt hiôk tih tên ăn bơ ngai hưch hanh lơ̆m teh đak.

Tang măt kơ dră chĕp kơ̆l Đảng, teh đak păng bơ ngai hưch hach kơ đă ƀŏng lŏng lơ̆m teh đak, Kơ dră teh đak Nguyễn Xuân Phúc hlôi pôk pơ ư păng bơ nê kơ bơ ngai vei lăng pơ tho đă ƀŏng lŏng Park Hang-seo păng dôm bơ ngai đă U23 Việt Nam hlôi iŏk jơ nei gĭt kăl tơ̆ SEA Games 31.Thủ tướng teh đak Phạm Minh Chính hlôi đei kơ thơ hmach kơ Khŭl pơ tho pơ hrăm păng Khŭl đă ƀŏng lŏng drŏ nglo U23 teh đak Việt Nam lăp đơ̆ng rŏng Khŭl đă jei iŏk đei Mê đai măih tơ̆ SEA Games 31. Jơ nei gĭt kăl năr ‘nâu, kŭm hăm Mê đai măih đơ̆ng Khŭl đă ƀŏng lŏng drŏ kăn păng jơ nei dôm môn pơ long tơ plŏng kơ dâu tơ̆ SEA Games 31 iŏk đei hlôi sơ kơ̆t hơ dăh anih dơ̆ng đơ̆ng đă ƀŏng Việt Nam pơ ma hơ drô̆, tơ plŏng kơ dâu Việt Nam pơ ma atŭm tơ̆ tơ ring păng ƀrư̆ ƀrư̆ yak truh tơ̆ apŭng plĕnh teh.

Thuem: Tơ blơ̆