VOV4.Bahnar - Pơ gê ‘năr 17/3, tơ̆ pơ lei tơm Hồ Chí Minh, Kơ dră teh đak Nguyễn Xuân Phúc hlôi pơ gơ̆r hop akŏm teh đak ‘măng mă 3 găh pơ jing teh đak chĕp kơ̆l pơ gơ̆r kiơ̆ khôi luơ̆t. Hop akŏm đei hơ năn: “Dôm tơ drong ‘nao, ‘lơ̆ng lơ̆m pơ jing păng jang pơ keh teh đak chĕp kơ̆l pơ gơ̆r kiơ̆ khôi luơ̆t xã hội chủ nghĩa Việt Nam truh sơ năm 2030, vă jang truh sơ năm 2045”. Đơ̆ng 1 năr răp mơ̆ng, pơ ma dơ nuh, chih iŏk dôm nơ̆r pơ ma dơ nuh, tơ gop tơ̆ Hop akŏm, Kơ dră teh đak Nguyễn Xuân Phúc hơ len lăng, pơ tôch 3 ‘măng Hop akŏm teh đak găh tơ drong jang ‘nâu đei tơ drong ‘lơ̆ng gĭt kăl, tơ chơ̆t ăn tơ drong jơ nei ƀơ̆t tơ lĕch jang lơ̆m yan âu hăm lơ tơ drong kơ tơ̆ng ang tôch kơ tih, tôch kơ kăp gĭt vă rơ̆ih iŏk, tơ mơ̆t lơ̆m tơ drong tơm đơ̆ng Tơ drong jang păng hla ar chih ming tơ drong tơ chơ̆t pơ truh ăn Trung ương.

Kơ dră teh đak Nguyễn Xuân Phúc

Kơ dră teh đak pơ ma hơ dăh, Tơ drong jang pơ jing păng jang pơ keh teh đak chĕp kơ̆l pơ gơ̆r kiơ̆ khôi luơ̆t xã hội chủ nghĩa Việt Nam truh sơ năm 2030, vă jang truh sơ năm 2045”  đei tơ drong gĭt kăl. ‘Nâu jĭ khei ‘năr tôch kơ hiôk, pơm hơ yak ‘lơ̆ng lơ̆m tơ plih ‘nao tơ drong jang chĭnh trĭ, pơm lăp hăm ‘meh vă hơ tŏk tơ iung mŭk drăm  tĕch mơ dro kiơ̆ trong xã hội chủ nghĩa păng mơ̆t jang hơ dai hăm apŭng plĕnh teh.

Thuem: Tơ blơ̆