VOV4.Bahnar - Hơ nơ̆ng bơ̆ jang hăm dôm anih tơm, anih jang kơ pal vă iŏk nơ̆r tơ gop hơ met pơ kĕh hla ar chih tơ drong jang “Trong jang gĭt kăl pơ jing păng hơ met pơ ‘lơ̆ng tĕh đak chĕp kơ̆l pơ gơ̆r kiơ̆ luơ̆t XHCN Việt Nam truh sơ năm 2030, trong vă jang truh sơ năm 2045”, ‘năr 7/7, Kơ dră tĕh đak Nguyễn Xuân Phúc pơ gơ̆r jang bơ̆ jang hăm Anih jang Đảng kơ Công an Trung ương, Khul kơ dră chĕp kơ̆l đảng kơ Anih tơm jang Tư pháp.

Tơ̆ dôm ‘măng bơ̆ jang, lơ nơ̆r tơ gop, pơ ma hơ dăh, Anih chĕp kơ̆l pơ gơ̆r jang hlôi pơ gơ̆r chih pơ jing Tơ drong jang tôch hơ len, lăp ‘lơ̆ng, đei nơ̆r tơ blang tôch rơ đăh păng lăp hăm yăn âu, hơ dai hăm ‘nŏh vang tơ gop 1,2 nơ̆r găh tơ drong pơ gơ̆r, bơ̆ jang đơ̆ng anih Công an, anih jang Tư pháp. Lơ̆m nŏh đei lơ nơ̆r tơ gop pơ ma truh tơ drong tơ plih ‘nao trong pơ gơ̆r păng bơ̆ jang đơ̆ng anih dăr hơ len, rim anih pơm kiơ̆ nơ̆r sek phak lapw hăm dôm tơ drong tơ̆ Việt Nam, pơm ‘lơ̆ng; vei kơ jăp tơ drong pơm tơm đơ̆ng kon bơ ngai lơ̆m tơ drong tơ iung pơ jing tĕh đak, mât jang hơ doi hăm apŭng plenh tĕh.

Pơ ma nơ̆r pơ tho lơ̆m jơ bơ̆ jang, hăm 1,2 tơ drong đei tơ lĕch lơ̆m Tơ drong jang ƀơm truh anih Công an, anih jang Tư pháp păng lơ anih jang nai hai, Kơ dră tĕh đak athei Khul kơ dră chĕp kơ̆l Anih pơ gơ̆r jang hơ nơ̆ng chă mơ̆ng, chih iŏk nơ̆r tơ gop lơ̆m dôm jơ bơ̆ jang, đơ̆ng noh chih hơ met vă tơ roi ăn Anih pơ gơ̆r jang set hơ len, chă rơih trong jang lăp hlŏh.

Dơ̆ng: Tơ blơ̆