VOV4.Bahnar - Kơ sơ̆ ‘năr 16/9, tơ̆ Anih jang kơ ƀok Kơ dră teh đak, Kơ dră teh đak Nguyễn Xuân Phúc sơng dôm bơ ngai jang khoa hŏk apŭng plĕnh teh vang truh Hop akŏm apŭng plĕnh teh “ Khoa hŏk, jơ hngơ̆m đon ‘lơ̆ng păng hơ tŏk tơ iung kon bơ ngai” tơ̆ Bình Định lơ̆m jơ năr pơ gơ̆r tơ drong jang “ Tơ ƀơ̆p Việt Nam” ‘măng mă 18. Tang măt teh đak păng kon pơ lei Việt Nam, Kơ dră teh đak Nguyễn Xuân Phúc kơ kuh chơt hơ iă kơ 51 ‘nu bơ ngai jang khoa hŏk apŭng plĕnh teh vang truh Hop a kŏm “ Khoa hŏk, jơ hngơ̆m đon ‘lơ̆ng păng hơ tŏk tơ iung kon bơ ngai”, đei dôm tơ drong jang khoa hŏk plang ăn teh đak păng apŭng plĕnh teh.

Kơ dră teh đak Nguyễn Xuân Phúc tơ ƀơ̆p dôm bơ ngai jang khoa hŏk apŭng plĕnh teh

Hơ dai hăm ‘noh, Kơ dră teh đak chih iŏk tơ drong hơ drin jang hơ dai pơ gơ̆r keh đang Hop akŏm đơ̆ng tơ drong jang “Tơ ƀơ̆p Việt Nam” hăm Jơ nŭm Nghị viện apŭng plĕnh teh, Anih tơm Khoa hŏk păng Kơ măy kơ mŏk, dêh char Bình Định, Anih jang tơ chĕng hơ len hơ tŏk tơ iung Phalăng tơ̆ Việt Nam. Hop akŏm jĭ 1 tơ drong jang gĭt kăl oei lơ̆m tơ drong jang đơ̆ng Anih tơm Khoa hŏk păng Kơ măy kơ mŏk, jang kiơ̆ Sơ năm Apŭng plĕnh teh Khoa hŏk yua kơ hơ tŏk tơ iung kơ jăp yua đơ̆ng Liên Hợp quốc pơ drơ̆ng kiơ̆ hơ tuch sơ năm 2021 păng UNESCO tơ băt hơ dăh khei 7 sơ năm 2022.

Thuem: Tơ blơ̆